اتر پردیش کے کئی اضلاع میں لوگوں کو گرمی سے ملے گی راحت، تیز ہواؤں کے ساتھ ہوگی بارش، یلو الرٹ جاری

اتر پردیش کے کئی اضلاع میں شدید گرمی پڑ رہی ہے، لیکن اس گرمی سے لوگوں کو راحت ملنے والی ہے۔ محکمہ موسمیات نے ریاست کے 60 اضلاع میں بارش کو لے کر یلو الرٹ جاری کیا ہے۔ یعنی ان ضلعوں میں بارش ہوگی اور لوگوں کو تپش سے نجات ملے گی۔ محکمہ موسمیات کے مطابق ریاست کے 60 اضلاع میں تیز ہواؤں کے ساتھ بارش کا امکان ہے۔ ساتھ ہی ان اضلاع میں بجلی گرنے کا بھی اندیشہ ہے۔ ایسے میں لوگوں کو محتاط رہنے کے لیے کہا گیا ہے۔

محکمہ موسمیات کے مطابق تین دنوں تک یوپی کے الگ الگ حصوں میں بارش ہونے کا امکان ہے۔ ریاست کے بیشتر حصوں میں آج بادل چھائے رہیں گے۔ راجدھانی لکھنؤ میں تو پیر کو پورے دن آسمان میں ہلکے بادل چھائے رہنے کا امکان ظاہر کیا گیا ہے اور شام کو یہاں ہلکی بارش بھی ہو سکتی ہے۔

لکھنؤ میں آج کم از کم درجہ حرارت 22 ڈگری اور زیادہ سے زیادہ درجہ حرارت 39 ڈگری تک رہنے کا اندازہ ظاہر کیا گیا ہے۔ نوئیڈا میں پورے دن بادل چھائے رہنے کا امکان ہے۔ یہاں کم از کم درجہ حرارت 21 ڈگری اور زیادہ سے زیادہ درجہ حرارت 38 ڈگری تک رہنے کا امکان ہے۔ وارانسی میں دن کے وقت ہلکے بادل چھائے رہنے کا امکان ہے۔ گزشتہ کچھ دنوں کے مقابلے درجہ حرارت میں ایک سے دو ڈگری تک کمی درج کی جا سکتی ہے۔

محکمہ موسمیات نے جن اضلاع میں موسم کے کروٹ لینے کا امکان ظاہر کیا ہے ان میں باندا، چترکوٹ، مین پوری، ایٹاوا، اوریا، بجنور، امروہہ، مراد آباد، رامپور، بریلی، پیلی بھیت، شاہجہاں پور، سنبھل، بدایوں، جالون، کانپور دیہات، کانپور سٹی، اناؤ، لکھنؤ، بارابنکی، رائے بریلی، امیٹھی، سلطان پور، ایودھیا، سہارنپور، شاملی، مظفر نگر، باغپت، میرٹھ، غازی آباد، ہاپوڑ، گوتم بدھ نگر، بلند شہر، علی گڑھ، متھرا، ہاتھرس، کاسگنج، ایٹہ، آگرہ، کوشامبی، پریاگ راج، فتح پور، پرتاپ گڑھ، سون بھدر، مرزاپور، چندولی، وارانسی، سنت روی داس نگر، جونپور، بہرائچ، لکھیم پور کھیری، سیتاپور، ہردوئی، فرخ آباد، قنوج، فیروز آباد، حمیر پور، مہوبہ، جھانسی، للت پور وغیرہ شامل ہیں۔ ان اضلاع میں بارش کے امکانات روشن ہیں۔