اٹلی میں بابائے قوم مہاتما گاندھی کا مجسمہ شرپسندوں نے توڑ دیا، کچھ دیر پہلے ہی ہوا تھا افتتاح

وزیر اعظم نریندر مودی جلد ہی اٹلی کا دورہ کرنے والے ہیں۔ اس سے عین قبل ایک شرمناک واقعہ پیش آیا ہے۔ میڈیا رپورٹس کے مطابق بدھ کے روز اٹلی میں خالصتان حامیوں نے مہاتما گاندھی کے ایک مجسمہ کو توڑ دیا۔ اس مجسمہ کا افتتاح کچھ ہی دیر قبل ہوا تھا جب اسے نہ صرف توڑا گیا، بلکہ وہاں پر خالصتان حامی نعرے بھی لکھے گئے۔

مقامی افسران کا کہنا ہے کہ شر پسندوں کی اس حرکت کا پتہ چلتے ہی جائے وقوع پر پہنچ کر فوراً وہاں صفائی کی گئی۔ اس معاملے میں ہندوستان کے خارجہ سکریٹری ونئے موہن کواترا نے کہا کہ ’’ہم نے رپورٹ دیکھی ہے۔ ہندوستان نے مہاتما گاندھی کے مجسمہ کو نقصان پہنچائے جانے کا معاملہ اٹلی کے افسران کے سامنے اٹھایا ہے۔ گاندھی جی کے مجسمہ کو ٹھیک کر دیا گیا ہے۔‘‘ انھوں نے مزید کہا کہ اٹلی کے افسران سے بات چیت ہوئی ہے اور ضروری کارروائی کی جا رہی ہے۔

قابل ذکر ہے کہ اٹلی کی وزیر اعظم جارجیا میلونی کی دعوت پر پی ایم مودی جی-7 اعلیٰ سطحی سمیلن میں حصہ لینے کل اٹلی کے لیے روانہ ہوں گے۔ تیسری مدت کار کے لیے وزیر اعظم بننے کے بعد ان کا یہ پہلا غیر ملکی دورہ ہوگا۔ جی-7 اعلیٰ سطحی سمیلن 13 جون سے 15 جون تک منعقد کیا جائے گا۔ اس سے عین قبل مہاتما گاندھی کا مجسمہ توڑنے والے شر پسندوں کے خلاف اٹلی نے کارروائی شروع کر دی ہے۔