تلنگانہ کے ایک گاؤں میں 92 سے زائد افراد کورونا سے متاثر، مکمل لاک ڈاؤن نافذ

حیدرآباد: تلنگانہ کے ضلع مُلگ کے وی آر کے وینکٹاپورم گاوں میں 92 سے زائد افراد ایک ہفتہ کے اندر کورونا سے متاثر ہوگئے جس کے بعد اس گاوں میں مکمل لاک ڈاون نافذ کر دیا گیا اور اسے ریڈ زون قرار دیا گیا۔ اس گاوں کی آبادی 853 ہے اور گزشتہ ہفتہ 50 فیصد سے زائد افراد کی جانچ کی گئی تھی۔

عہدیداروں نے بتایا کہ زیادہ تر افراد جو مثبت پائے گئے ہیں نے گاوں میں ایک شخص کی موت کے بعد اس کے رشتہ داروں کی جانب سے منعقد کی گئی تقریب میں شرکت کی تھی اور اس میں کھانا کھایا تھا۔ نہ صرف اس گاوں بلکہ کملاپور گاوں کے 73 افراد بھی اس دعوت میں شرکت کے بعد مثبت پائے گئے۔

مُلگ کے ڈاکٹر ایپا نے کہا کہ اس پورے گاوں میں لاک ڈاون نافذ کر دیا گیا ہے اور اس کو ریڈ زون قرار دیا گیا ہے۔ اس گاوں میں داخلہ پر پابندی ہے۔ دس سے زائد مریضوں کو ایٹونا گارم سرکاری اسپتال منتقل کیا گیا۔ کیونکہ ان کی حالت تشویشناک تھی۔ کئی افراد کو الگ تھلگ کردیا گیا اور بعض دیگر کو الگ تھلگ مرکز میں منتقل کیا گیا۔