جمعیتہ علماء کی اہم میٹنگ دیو بند میں آج

مسلم سماج میں اصلاحات،ان کی بہتر تعلیم اور فرقہ واریت سمیت مختلف موضاعات کے سلسلے میں جمعتہ علماء ہند کی اہم میٹنگ  آج سہارنپور کے دیوبند میں منعقد ہوگی۔

جمعتہ علماء ہند کے ترجمان مولان کعب رشیدی نے اتوار کو بتایا کہ دیوبند واقع مدنی میموریل پبلک اسکول میں منعقد ہونے والی اس اہم میٹنگ میں مغربی اترپردیش کے 17اضلاع میں جمعیتہ کی مختلف اکائیوں کے کل 1700 نمائندے شرکت کریں گے۔ انہوں نے بتایا کہ تنظیم کے ریاستی صدر مولانا اشہد رشیدی کی صدارت میں ہونے والی اس میٹنگ میں تنظیم کے قومی صدر مولانا ارشد مدنی کلیدی خطبہ پیش کریں گے۔

جمعیتہ ترجمان نے اس میٹنگ کے ایجنڈے کا ذکر کرتے ہوئے بتایا کہ میٹنگ میں خاص طور سے مسلم سماج میں بہتری کے پروگرام کو ایک تحریک کی شکل میں چلانے، فرقہ واریت سے نپٹنے کے کئے سماجی اتحاد، پیار اور اعتماد کے ذریعہ ملک کے سبھی طبقات کو آپس میں جوڑنے،مسلم بچوں کو جدید تعلیم سے آراستہ کرانے کے لئے بہتر تعلیمی اداروں کا قیام،تنظیم کی نئی اکائیاں قائم کرنے اور پرانی اکائیوں کو سرگرم بنانے جیسے نکات شامل ہیں۔

انہوں نے بتایا کہ میٹنگ میں جمعیتہ علماء ہند کے مستقبل کا ایکشن پلان، انسانیت پر مبنی ریاستی اور قومی خدمات، ہندو مسلم ایکتا  کی کوششیں اور تعلیمی اور سماجی خدمات سے متعلق پانچ تجاویز بھی پیش کی جائیں گی۔