اسکولوں میں کووڈ رہنما اصولوں پر عملدرآمد ناگزیر: ڈائریکٹر ہیلتھ سروسز

سری نگر: ڈائریکٹر ہیلتھ سروسز کشمیر ڈاکٹر مشتاق احمد راتھر کا کہنا ہے کہ اسکولوں میں کووڈ رہنما اصولوں پر عملدرآمد کی خاطر محکمہ صحت اور محکمہ ایجوکیشن نے مختلف ٹیمیں تشکیل دی ہیں۔ انہوں نے بتایا کہ کلاسز میں دو گز کی دوری کو بنائے رکھنے کی خاطر اسکول انتظامیہ کو قبل از وقت جانکاری فراہم کی گئی ہے۔ اُن کے مطابق ماسک کے بغیر کسی بھی طالب علم کو اسکول کے اندر جانے کی اجازت نہیں ہوگی۔ ان باتوں کا اظہار موصوف نے جواہر لال نہرو اسپتال میں نامہ نگاروں کے ساتھ بات چیت کے دوران کیا۔

انہوں نے کہا کہ ایل جی انتظامیہ نے اسکولوں کو دوبارہ کھولنے کا فیصلہ لیا ہے، جس کے پیش نظر محکمہ صحت کی جانب سے بھی اس حوالے سے اقدامات اُٹھائے جا رہے ہیں۔ اُن کے مطابق محکمہ صحت اور اسکول ایجوکیشن کے عہدیداروں نے اس حوالے سے لگاتار میٹنگیں کیں اور ایک لائحہ عمل کو ترتیب دیا، جس پر اسکول منتظمین کو من وعن عمل کرنے کی ضرورت ہے۔

مشتاق احمد راتھر نے بتایا کہ اسکولوں کی گاڑیوں میں ایس او پیز پر عملدرآمد کی خاطر بھی ٹیمیں تشکیل دی گئی ہیں۔ انہوں نے کہا کہ اسکولوں کے باہر اسکریننگ سینٹر قائم کرنے کی ہدایت دی گئی ہے اور بغیر اسکریننگ کے کسی بھی بچے کو اسکول کے اندر جانے کی اجازت نہیں ہوگی۔ موصوف نے مزید بتایا کہ کلاسوں میں کووڈ رہنما اصولوں پر عملدرآمد ناگزیر ہے اور اس کے لئے منتظمین کو پہلے ہی آگاہی فراہم کی گئی ہے۔

مشتاق راتھر نے بتایا کہ ہر بچے پر لازم ہے کہ وہ اسکول کے اندر جانے سے قبل ماسک کا استعمال کریں، کیونکہ ماسک کے بغیر کسی کو بھی اسکول احاطے کے اندر جانے کی اجازت نہیں ہوگی۔ ڈائریکٹر موصوف نے بتایا کہ ایس او پیز پر عملدرآمد کی خاطر اسکول ایجوکیشن ، محکمہ صحت اور ضلع انتظایہ نے مشترکہ ٹیمیں تشکیل دی ہیں جو اسکولوں پر نظر گزر بنائے رکھی گی۔