پاکستان نے حکم کی خلاف ورزی کی تو اس پر عالمی پابندی لگ سکتی ہے: سالوے

عالمی عدالت میں کلبھوشن جادھو کے مقدمے کی پیروی کرنے والے ہندوستان کے معروف وکیل ہریش سالوے نے بدھ کو پاکستان کو وارننگ دی کہ اگراس نے جادھو کے معاملے دوبارہ فرضی واڑہ کرنے کی کوشش کی تو اسے پھر عالمی عدالت میں گھسیٹا جائے گا اور اس پر عالمی پابندی بھی لگائی جا سکتی ہے۔
سالوے نے عالمی عدالت کا فیصلہ آنے کے بعد ایک پریس کانفرنس سے خطاب کرتے ہوئے کہا کہ وہ ہندوستان کی جانب سے عالمی عدالت کا شکریہ ادا کرتے ہیں جس نے اس معاملے میں دخل دے کر جادھو کو تختہ دار پر چڑھنے سے بچا لیا۔

انہوں نے کہا کہ پاکستان نے بار بار جادھو کے پاس سے برآمدمبینہ پاسپورٹ کی سلائڈ دکھائی۔ عدالت نےاس پر خصوصی توجہ دی اور پاکستان کے اس دلیل کو خارج کردیا کہ جادھو کی شہریت غیر یقینی ہے۔ عدالت نے کہا کہ جادھو پر پاکستان کے آئین کے مطابق ایک غیر جانبدارانہ مقدمہ چلے۔ اگر یہ مقدمہ فوجی عدالت پر انہی ضابطوں اور قوانین کی بنیاد پر چلایا جاتا ہے جہاں باہر ی وکلاء کو جازت نہیں، ہمیں اجازت نہیں ہے، ملاقات کی اجازت نہیں، ثبوت نہیں دیے جاتے تو یہ متوقع معیارکے مطابق نہیں ہوگا۔ سالوے نے کہا کہ پاکستان کو جادھو کو وکیل مہیا کروانا ہوگا۔ اگر ایسا نہیں ہوتا ہے تو ہم دوبارہ عالمی عدالت کا دروازہ کھٹکھٹائیں گے۔ اگر پاکستان عالمی عدالت کے حکم کی خلاف ورزی کرتا ہےتو اس پر پابندی لگائےجانے سمیت کئی اقدامات کیے جا سکتے ہیں۔

ایک سوال کے جواب میں ہریش سالوے نے کہا کہ عدالت واضح کر چکی ہے کہ جادھو کو ہراساں نہیں کیا جا سکتا ہے۔ یہ کہے جانے پر کہ پاکستانی عدالت میں وہ جادھو کی جانب سے نہیں لڑسکیں گے، انہوں نے کہا کہ انھیں پورا بھروسہ ہے کہ پاکستان میں کئی ’شاندار وکیل‘ ہیں جو جادھو کی پیروی کرسکتے ہیں۔ پاکستان کے ذریعے استعمال کیے گئے تجزیہ اور عدالت میں دیے گئے جواب کو سالوے نے افسوسناک قرار دیا اور کہا کہ ان کی تہذیب اور ہندوستانی روایت کے مطابق ایسی زبان میں جواب نہیں دیا جاتا۔ انہوں نے کہا کہ پاکستان نے ضابطوں کے غلط استعمال کی بنیاد پر الزام لگائے تھے اور کہا تھا کہ یہ وہ بنیاد ہیں جن پر ہندوستان کے حق میں فیصلہ نہیں کیا جانا چاہیے۔ عالمی عدالت نے پاکستان کے دلائل خارج کر دئے۔

سالوے نے کہا،’ ہم پاکستان سے امید کرتے ہیں کہ وہ ایک غیر جانبدارانہ مقدمے کی گارنٹی کے لیے مکمل قانونی چارہ جوئی کریگا۔ پاکستان کا رویہ دنیا دیکھ رہی ہے اور اگر وہ ایک بھی اور فرضی واڑہ کی کوشش کرتا ہے ، تو ہم دوبارہ عالمی عدالت جائیں گے‘۔