’میں جلد باہر آؤں گا‘، اہلیہ سنیتا نے پڑھا جیل میں قید کیجریوال کا پیغام

پیغام میں انہوں نے مزید پڑھا، ’’دہلی میں خواتین سوچ رہی ہوں کہ کیجریوال جیل کی سلاخوں کے پیچھے ہیں، کون جانتا ہے کہ انہیں 1000 روپے ملیں گے یا نہیں۔ میں ان سے اپیل کرتا ہوں کہ وہ اپنے بھائی، اپنے بیٹے پر بھروسہ کریں، ایسی کوئی جیل نہیں جو اسے زیادہ دیر تک سلاخوں کے پیچھے رکھ سکے۔ میں جلد باہر آؤں گا اور وعدہ پورا کروں گا۔‘‘

سنیتا کیجریوال نے مزید کہا، کیجریوال نے اپنا ہر وعدہ پورا کیا۔ لوگوں کی دعائیں کیجریوال کے ساتھ ہیں۔ ان کی زندگی کا ہر لمحہ ملک کے لیے وقت ہے۔ اروند کیجریوال کا پیغام پڑھتے ہوئے سنیتا نے مزید کہا کہ میری عام آدمی پارٹی کے کارکنوں سے اپیل ہے کہ عوامی خدمت کا کام نہ رکے اور اس وجہ سے بی جے پی والوں سے نفرت نہ کریں، بی جے پی والے بھی ہمارے بھائی بہن ہیں، میں جلد واپس آؤں گا۔

خیال رہے کہ قومی راجدھانی کی ایک عدالت نے جمعہ کو دہلی کے وزیر اعلی اروند کیجریوال کو شراب پالیسی سے متعلق منی لانڈرنگ کیس میں 28 مارچ تک انفورسمنٹ ڈائریکٹوریٹ (ای ڈی) کی تحویل میں بھیج دیا تھا۔