آڈ-ایون سے آلودگی کس طرح کم ہوگی؟ دہلی حکومت نے سپریم کورٹ میں دیا جواب

نئی دہلی: دہلی میں بڑھتی ہوئی فضائی آلودگی کو روکنے کے لیے دہلی حکومت نے سپریم کورٹ کی تنقید کے بعد جمعہ (10 نومبر 2023) کو اپنا حلف نامہ داخل کیا۔ اس حلف نامے میں اس نے عدالت کو بتانے کی کوشش کی ہے کہ طاق و جفت فارمولے کے نفاذ سے آلودگی پر کیا اثر پڑتا ہے۔

اس اسکیم کا دفاع کرتے ہوئے دہلی حکومت نے کہا کہ اس سے گاڑیوں کی بھیڑ کم ہوتی ہے۔ پبلک ٹرانسپورٹ کا استعمال بڑھتا ہے، ایندھن کی کھپت میں کمی آتی ہے۔ دہلی حکومت نے مزید کہا کہ دیگر ریاستوں میں رجسٹرڈ ٹیکسیوں کو دہلی آنے سے مکمل طور پر روکنا ممکن نہیں ہے۔ ایندھن کے استعمال اور ان کی تعداد کی بنیاد پر محدود پابندیاں لگائی جا سکتی ہیں۔

حال ہی میں دہلی میں بڑھتی آلودگی کے معاملے پر سماعت کرتے ہوئے سپریم کورٹ نے ذمہ دار ریاستی حکومتوں کو سخت پھٹکار لگائی تھی۔ عدالت نے کہا کہ آلودگی کو روکنا عدالت کی ذمہ داری نہیں ہو سکتی، سب کو اس میں حصہ دار بن کر اپنی ذمہ داری کو یقینی بنانا ہو گا۔ حکومت سے یہ سوال بھی پوچھا گیا کہ دہلی میں آلودگی کے مسئلے سے نجات دلانے کے لیے عدالت کو کیا کرنا پڑے گا۔

دہلی حکومت نے آلودگی پر قابو پانے کے لیے ان کی طرف سے اٹھائے گئے اقدامات کے بارے میں بتایا اور کہا کہ وہ شہر میں ایک بار پھر طاق و جفت کو نافذ کرنے کا منصوبہ بنا رہے ہیں۔ جس پر سپریم کورٹ نے برہمی کا اظہار کرتے ہوئے کہا کہ ان کی جانب سے آلودگی کو روکنے کے لیے جو اقدامات کیے جا رہے ہیں وہ ناکافی ہیں۔ ان کا مزید کہنا تھا کہ آلودگی پر قابو پانے کا سب سے غیر سائنسی طریقہ طاق و جفت فارمولہ ہے، حکومت بتائے کہ یہ اقدامات آلودگی کو کم کرنے میں کس طرح مدد کرتے ہیں؟