منی پور کےوزیر اعلی کے بنگلے کے قریب زبردست آگ لگی

منی پور کی راجدھانی امپھال کے اولڈ لامبولین میں ہائی سیکوریٹی سیکریٹریٹ کمپلیکس کے قریب ایک مکان میں آج آگ لگ گئی۔ جس گھر میں آگ لگی وہ وزیر اعلیٰ این بیرن سنگھ کے سرکاری بنگلے سے کچھ ہی فاصلے پر ہے۔

آگ لگنے کی وجہ تاحال معلوم نہیں ہو سکی۔ پولیس نے کہا کہ یہ خالی مکان گوا کے سابق چیف سکریٹری آنجہانی تھانگکھوپاؤ کپگن کا تھا۔ پولیس کے مطابق فائر بریگیڈ کی گاڑیوں نے موقع پر پہنچ کر آگ پر قابو پالیا۔

جس گھر میں آگ لگی وہ کوکی ان کمپلیکس کے ساتھ واقع ہے، جو امپھال کے بابوپارہ میں منی پور کے وزیر اعلیٰ این بیرن سنگھ کی رہائش گاہ کے سامنے ہے۔ پولیس نے بتایا کہ منی پور میں جاری تشدد کی وجہ سے اس گھر کے لوگ پہلے ہی چلے گئے تھے۔

مکان کی چھت لکڑی اور جستی ٹن سے بنی ہوئی تھی جس کی وجہ سے آگ کے شعلے مزید شدت اختیار کر گئے۔ جس کی وجہ سے آگ بجھانے کے لیے تھوبل ضلع سے اضافی فائر ڈیپارٹمنٹ کی مدد لی گئی۔ فائر فائٹرز کو آگ بجھانے میں ایک گھنٹے سے زائد کا وقت لگا۔

نیوز پورٹل ’اے بی پی‘ پر شائع خبر کے مطابق منی پور کے فائر ڈپارٹمنٹ کے حکام نے بتایا کہ چونکہ مکان ایک سال سے زیادہ عرصے سے خالی پڑا تھا، اس لیے آگ کو بجھانا اور اس پر قابو پانا مشکل تھا۔ منی پور کے وزیر اعلی این بیرن سنگھ کے سیکورٹی قافلے پر10 جون 2024 کو کانگ پوکپی ضلع میں حملہ کیا گیا۔ اس کے بعد سیکورٹی فورسز نے فوری جوابی کارروائی کی۔