سوامی کی 71 افراد کے ساتھ گیان واپی مسجد میں پوجا کرنے کی کوشش، پولیس نے کیا مٹھ میں نظر بند

وارانسی: گیان واپی مسجد میں پوجا کرنے کا اعلان کرنے والے شنکراچاریہ سوروپانند سرسوتی کے شاگرد اوی مکتیشورانند کو پولیس نے ان کے مٹھ میں نظر بند کر دیا ہے۔ سوامی کا اعلان تھا کہ گیان واپی مسجد میں کئے گئے سروے کے دوران جس مقام سے مبینہ شیولنگ برآمد ہوا ہے وہ وہاں پر 71 افراد کے ہمراہ پوجا کرنے کے لئے جائیں گے۔

’آج تک‘ پر شائع رپورٹ کے مطابق اس اعلان کے پیش نظر مٹھ کے باہر بھاری تعداد میں پولیس فورس کی تعیناتی کی گئی۔ سوامی اوی مکتیشورانند نے مٹھ سے پوجا کے لئے نکلنے کی کوشش کی لیکن پولیس نے انہیں باہر نکلنے کی اجازت نہیں دی۔ پولیس نے مٹھ کو چاروں اطراف سے اپنے حصار میں لے لیا۔ مٹھ کے اندر اور باہر جانے والوں پر بھی کڑی نظر رکھی جا رہی ہے۔

اوی مکتیشورانند نے کہا کہ انہوں نے واٹس ایپ پر اجازت کے لیے پولس کمشنر کو خط بھیجا ہے اور اس حوالے سے انہیں تحریری جواب درکار ہے۔ انہوں نے کہا کہ پوجا رکنا میرا حق ہے۔ دریں اثنا، سوامی نے انشن بھی شروع کر دیا ہے اور ان کا کہنا ہے کہ وہ گیان واپی مسجد میں پوجا کرنے تک کھانا نہیں کھائیں گے۔ اوی مکتیشورانند نے کہا کہ انہوں نے پوجا کرنے کی دوبارہ اجازت طلب کی تھی لیکن انہیں کوئی جواب نہیں دیا گیا۔ انہوں نے کہا کہ جس ملک میں کروڑوں ہندو بھکت ہوں، کیا اس ملک میں بھگوان بھوکا رکھا جائے گا؟

اس سے قبل انتظامیہ کی جانب سے جاری بیان میں اس بات پر زور دیا گیا ہے کہ جہاں سنت پوجا کرنے کا مطالبہ کر رہے ہیں اس مقام کو عدالت کے حکم پر سیل کیا گیا ہے۔ لہذا وہاں پوجا کی اجازت نہیں دی جا سکتی۔ یہ بھی واضح کیا گیا ہے کہ اگر کسی نے انتظامیہ کے احکامات پر عمل نہیں کیا تو اس کے خلاف سخت ترین کارروائی کی جائے گی۔

خیال رہے کہ سوامی اوی مکتیشورانند اپنے بیانات کی وجہ سے ہمیشہ سرخیوں میں رہتے ہیں۔ کچھ دن پہلے انہوں نے ایک بیان میں کہا تھا کہ سناتن دھرم میں صرف ایک ہی دیوتا مانا جاتا ہے اور وہ شیو ہے۔ جو شیو کو نہیں جانتا، اس کی شان کو نہیں سمجھتا، وہ شیولنگ کو فوارہ ہی کہے گا! انہوں نے مزید کہا تھا کہ اگر گیان واپی سے شیولنگ برآمد ہوا ہے تو وہاں پوجا ہونی ضروری ہے۔