گوالیار میں گاندھی کے قاتل گوڈسے کی پوجا، کانگریس نے کی مذمت

گوالیار/بھوپال: ایک طرف جہاں حال ہی میں ملک اور دنیا میں بابائے قوم مہاتما گاندھی کی 150 ویں یوم پیدائش منائی گئی، وہیں دوسری طرف ہندو مہاسبھا نے جمعہ کے روز مدھیہ پردیش کے گوالیار میں گاندھی کے قاتل ناتھورام گوڈسے کا مبینہ بلیدان دیوس (یوم قربانی) منایا اور اس کی پوجا بھی کی گئی۔ ہندو مہاسبھا نے یہ مطالبہ بھی کیا ہے کہ گوڈسے کی تاریخ کو اسکولی نصاب میں شامل کیا جانا چاہئے۔ ادھر کانگریس کانگریس نے ہندو مہا سبھا کے اس عمل کی مذمت کی ہے اور بی جے پی سے وضاحت طلب کی ہے۔

اطلاعات کے مطابق ہندو مہاسبھا کارکنوں نے جمعہ کے روز گوالیار میں واقع ان کے دفتر میں ناتھورم گوڈسے کا 70 واں مبینہ ’بلیدان دیوس‘ منایا، اس کی پوجا کی اور انتظامی عملے کو ایک مکتوب بھی پیش کیا۔ اس مکتوب کے ذریعہ یہ مطالبہ کیا گیا ہے کہ ناتھورام گوڈسے کے آخری وقت کی تقریروں کو عام کیا جائے اور انہیں مدھیہ پردیش کے اسکولی نصاب میں بھی شامل کیا جائے۔

ہندو مہا سبھا کے عہدیداروں کا کہنا ہے کہ گاندھی کی وجہ سے ہی ملک تقسیم ہوا اور اس کی وجہ سے ہی ناتھورام گوڈسے نے گاندھی کا قتل کیا تھا۔ ہندو مہاسبھا کے کارکنوں نے گاندھی کو ’سب سے بڑا غدار‘ جبکہ گوڈسے کو محب وطن قرار دیا ہے۔ وہ کہتے ہیں کہ ’بھگوان شری رام نے راون کو مارا تھا اور شری کرشن نے کنس کو مارا، اسے تاریخ میں پڑھایا جاسکتا ہے، پھر ناتھورام گوڈسے کی تاریخ کو کیوں نہیں پڑھایا جاسکتا ہے! ہندو مہاسبھا نے تحصیلدار آر کے کھرے کو اس منشا کا ایک مکتوب پیش کیا۔

کانگریس نے گوڈسے کا بلیدان دیوس کو منانے پر ہندو مہاسبھا کی سخت الفاظ میں مذمت کی ہے۔ پارٹی کے ریاستی ترجمان اجے یادو نے کہا ، ’’ہندو مہاسبھا کا یہ عمل انتہائی قابل مذمت ہے۔ یہ ملک گاندھی کے اصولوں پر چلتا ہے۔ اس ملک کو گاندھی نے آزاد کرایا، حکومتیں گاندھی کے اصولوں پر چلتی ہیں۔ بی جے پی کو واضح کرنا چاہئے کہ وہ ’ان لوگوں‘ کے ساتھ کھڑی ہے یا پھر ان کے خلاف ہے۔‘‘