کورونا وائرس کا اثر: کوہِ ہمالیہ کا پنجاب سے نظارہ!

کورونا کی وجہ سے ہونے والے لاک ڈاؤن کا ایک فائدہ یہ ہوا ہے کہ فضائی آلودگی میں غیرمعمولی کمی واقع ہوئی ہے۔ فضائی آلودگی کی وجہ سے برسوں سے ہندوستان میں کوہ ہمالیہ کی فلک بوس چوٹیاں قرب جوار کے مکینوں سے چھپی ہوئی تھیں مگر حالیہ ہفتوں کے دوران یہ دوبارہ نظر آنے لگی ہیں اور بار ایک پھر توجہ کا مرکز بن گئی ہیں۔

ہمالیہ سلسلے میں پنجاب کے شہر جالندھر سے 200 کلو میٹر دور ماؤنٹ ایورسٹ واقع ہے مگر لوگ گذشتہ 30 برسوں سے کوہ ہمالیہ کی چوٹیوں کے نظاروں سے محروم تھے۔ حالیہ عرصے میں ملک میں ہونے والک ڈاؤن اور فضائی آلودگی میں کمی نے ہمالیہ کے قابل دید مناظر ایک بار پھر نمایاں کر دیے ہیں۔

لوگ کوہ ہمالیہ کےنظاروں سے بہت متاثر ہو رہے ہیں اور ان کی تصاویر اور ویڈیوز انٹرنیٹ پر شیئر کر رہے ہیں۔ دراصل اس سے قبل ہمالیہ کا براہ راست نظارہ ممکن نہیں تھا اور لوگ صرف انٹرنیٹ پر ہی اس کی تصاویر دیکھ پاتے تھے۔

سابق کرکٹر ہربھجن سنگھ کا کہنا ہے کہ انہوں نے اپنے گھر سے پہلی بار کوہ ہمالیہ کا نظارہ کیا۔ آج تک کوہ ہمالیہ کی یہ خوبصورتی فضائی آلودگی کی وجہ سے آنکھوں سے اوجھل رہی اور ہم لوگ صرف تصاویر اور ویڈیوز ہی میں ان مقامات کو دیکھ پاتے تھے۔

خیال رہے کہ ہندوستان میں کورونا وائرس کی وباء پھیلنے کے بعد حکومت نے 21 روزہ لاک ڈاؤن نافذ کیا ہوا ہے جو 14 اپریل تک جاری رہے گا۔ حکومت کا کہنا ہے کہ لاک ڈاؤن کی مدت میں اضافہ ہو سکتا ہے۔ لاک ڈاؤں کے نتیجے میں سڑکوں پر گاڑیاں چلنا بند ہوگئی ہیں۔ فضائی خدمات تعطل کا شکار ہے اور دھواں چھوڑنے والے کارخانے بھی بند ہیں۔ یہی وجہ ہے کہ آلودگی سے ملک میں فضائی آلودگی میں غیرمعمولی کمی آئی ہے۔