حجاب تنازعہ: 11 دنوں کی سماعت کے بعد کرناٹک ہائی کورٹ نے فیصلہ رکھا محفوظ

حجاب تنازعہ پر کرناٹک ہائی کورٹ کا فیصلہ اب کسی بھی وقت سامنے آ سکتا ہے۔ 11 دنوں کی سماعت کے بعد 25 فروری کو کرناٹک ہائی کورٹ میں حجاب پر پابندی کے خلاف داخل عرضی پر فیصلہ محفوظ رکھ لیا گیا ہے۔ مسلم طالبات کے ذریعہ داخل کی گئی عرضیوں میں ایک سرکاری پی یو کالج کے ذریعہ حجاب (ہیڈ اسکارف) پہن کر مسلم طالبات کو داخل کرنے سے انکار کرنے کی کارروائی کو چیلنج پیش کیا گیا تھا۔

چیف جسٹس ریتو راج اوستھی، جسٹس کرشنا ایس دیکشت اور جسٹس جے ایم قاضی کی بنچ کے سامنے سماعت 11 دنوں تک چلی۔ قابل ذکر ہے کہ عدالت کا وہ عبوری فیصلہ اب بھی نافذ ہے جس میں اسٹوڈنٹس کو کلاس میں کسی بھی طرح کے مذہبی کپڑے ہننے سے روکا گیا تھا۔

فریقین اور حجاب تنازعہ پر مداخلت کی درخواست داخل کرنے والوں کو اپنی تحریری دلیلیں داخل کرنے کی چھوٹ دی گئی ہے۔ اس معاملے میں عدالت کے سامنے ایک اہم سوال یہ ہے کہ کیا حجاب پہننا اسلام کی ضروری مذہبی روایت کا حصہ ہے، اور کیا ایسے معاملوں میں ریاست کی مداخلت کی ضرورت ہے؟ عدالت کو اس پر بھی غور کرنا ہے کہ کیا حجاب پہننا آئین کے شق 19(1)(اے) کے تحت اظہارِ رائے کے حقوق کے کردار کا حصہ ہے، اور کیا صرف شق 19(2) کے تحت پابندی لگائی جا سکتی ہے؟