ملک کی مختلف ریاستوں میں درماندہ جموں و کشمیر کے سینکڑوں باشندوں کے لئے ہیلپ لائین قائم

سری نگر: ملک کے مختلف حصوں میں قیام پذیر جموں وکشمیر کے باشندوں کوسہولیات فراہم کرنے کے لئے جے اینڈ کے ریذیڈنٹ کمشنر نئی دلی کے دفتر میں دن رات کام کرنے والی ہیلپ لائین قائم کی گئی ہے۔ اس ہیلپ لائین کے ساتھ تعینات عملہ پچھلے 14 روز سے دن رات کام کر رہا ہے۔

ہیلپ لائین کے ذریعے ملک کی 18 سے زائد ریاستوں میں درماندہ ہوئے جموں وکشمیر کے باشندوں کو غذائی اجناس کے علاوہ دیگر سہولیات بھی فراہم کی جا رہی ہیں۔ ہیلپ لائین کے کام کاج کی نگرانی پرنسپل ریذیڈنٹ کمشنر دھیرج گپتا کرتے ہیں جبکہ اس میں سات آفیسر اہم رول ادا کر رہے ہیں۔

گزشتہ 14 دنوں کے دوران ان لیزان افسروں نے ملک کے مختلف حصوں سے تقریباً 250 فون کالز وصو ل کیے ہیں اور 800 سے زائد طالب علموں کو مدد فراہم کی جاچکی ہے۔ جن علاقوں میں جموں وکشمیر کے باشندوں کو اس ہیلپ لائین کے ذریعے مختلف سہولیات فراہم کی جاچکی ہے۔ اُن میں چندی گڑھ، مہالی، روپر، بھوپال، کوٹا، جے پور، پونے، بنگلورو، چنئی، حیدرآباد، ممبئی، دھرا دون اور دلی شامل ہیں۔

جہاں تک جموں وکشمیر کے مختلف ورکروں، مزدوروں اور تاجروں کو مدد فراہم کرنے کا سوال پیدا ہوتا ہے تو اس ٹیم نے تقریباً 30 مقامات سے 1000 سے زائد فون کال پچھلے 14روز کے دوران وصول کیے ہیں اور 2500 افراد کو مدد فراہم کی جاچکی ہے۔

ممبئی اور دلی میں درماندہ ہوئے کئی مریضوں کو لیزان افسروں نے مدد فراہم کر کے عارضی اقامتی سہولیات دستیاب کرائی ہے۔ اس کے علاوہ جموں وکشمیر میں حیات بخش ادویات استعمال کرنے والے کئی لوگوں کو یہ ادویات فراہم کرائی جاچکی ہے جبکہ لیزان آفیسر ممبئی نے ممبئی سے سری نگر تک 20000 ماسک بھیجے ہیں جن کو سکمز میں استعمال میں لایا جائے گا۔