کرناٹک میں زوردار بارش بنی آفت، سیلاب اور لینڈ سلائڈنگ کا خطرہ

کرناٹک میں ہفتہ کے روز سے زوردار بارش جاری ہے۔ اس سے لوگوں کی معمولاتِ زندگی بری طرح متاثر ہوئی ہے۔ ساحلی اور پہاڑی اضلاع کے ساتھ ساتھ شمالی کرناٹک کے اضلاع بھی زبردست بارش سے پیدا مسائل کا سامنا کر رہے ہیں۔ شمالی کرناٹک کے ضلعے سیلاب کے خطرے کا سامنا کر رہے ہیں۔ ٹھنڈی ہوائیں اور بونداباندی کے ساتھ راجدھانی بنگلورو کی صبح سہاؤنی رہی۔

کلبرگی، بیلگاوی اور بیدر اضلاع میں ہفتہ اور اتوار کے لیے زرد الرٹ جاری کیا گیا ہے۔ کلبرگی کے ضلع کمشنر نے ہفتہ کو اسکولوں اور کالجوں میں چھٹی کا اعلان کر دیا۔ مغربی گھاٹ میں بارش کی وجہ سے شمالی کنڑ ضلع میں کالی ندی کی آبی سطح 3 فٹ تک بڑھ گئی ہے۔ علاوہ ازیں 124.80 فٹ اونچے کے آر ایس پشتہ میں پانی کا بہاؤ کافی بڑھ گیا ہے۔ کاویری ندی کے کنارے رہنے والے لوگوں کو بھی متنبہ کیا گیا ہے۔

ریاست میں بارش کے سبب وردا، کمدوتی، تنگبھدرا ندیوں کی آبی سطح میں بھی اضافہ ہو گیا ہے۔ ایجنسیوں نے اڈوپی کے ساحلی اضلاع میں زوردار بارش کی پیشین گوئی کی ہے اور ہفتہ کے لیے ریڈ الرٹ جاری کیا گیا ہے۔ ساتھ ہی چکمنگلور، شیوموگا، کوڈاگو اور ہاسن اضلاع میں آرینج الرٹ جاری کیا گیا ہے۔ شمالی کنڑ ضلعوں کے کئی مقامات پر لینڈ سلائڈنگ کا خطرہ منڈلا رہا ہے۔ ضلع میں شروتی، کالی، اگھناشنی اور گنگاولی ندیاں خطرناک سطح کو پار کر رہی ہیں۔ ریاست میں اب تک اس بارش نے 12 لوگوں کی جان لے لی ہے۔