اتوار سے کئی قوانین میں بدلاؤ، ٹریفک اصولوں کی خلاف ورزی پڑے گی بھاری

نئی دہلی: ملک میں ستمبر کی پہلی تاریخ سے کئی بڑی تبدیلیاں کی جارہی ہیں۔ ان میں ٹریفک قوانین کی خلاف ورزی کرنے پر جرمانہ کی رقم کئی گنا کیے جانے اور بینک اکاؤنٹ سے ایک کروڑ روپے سے زیادہ نکالنے پر ٹیکس ڈیڈکشن ایٹ سورس (ٹی ڈی ایس) جیسی کئی تبدیلیاں ہوجائیں گی۔

سڑک حادثات میں مسلسل ہو رہے اضافہ کے پیش نظر اصولوں کی خلاف ورزی کرنے پر جرمانہ کی رقم میں کئی گنا اضافہ کیا گیا ہے۔ اس ضابطہ سے متعلقہ بل پارلیمنٹ کے پچھلے اجلاس میں ہی منظور ہوا تھا۔ جرمانہ میں اضافہ یکم ستمبر سے نافذ ہوجائے گا۔

نئے اصولوں کے مطابق بغیرلائسنس گاڑی چلانے کی رقم کو ایک ہزار روپے سے بڑھا کر پانچ ہزار روپے کیا گیا ہے۔ شراب پی کر گاڑی چلانے پر اب دس ہزار روپے کا جرمانہ ہوگا۔ پہلے یہ رقم دو ہزار روپے تھی، مقررہ رفتار سے تیز رفتار چلانے کے معاملہ میں جرمانہ کی رقم کو 500 روپے سے بڑھاکر پانچ ہزار روپے کیا گیا ہے۔

ایمرجنسی خدمات کے کام میں لگی گاڑیوں کو گزرنے کے لئے جگہ نہیں دینے پر دس ہزار روپے کا جرمانہ ادا کرنا ہوگا۔ گاڑی چلاتے وقت موبائل پر بات کرتے ہوئے پکڑے جانے پر پانچ ہزار روپے کا جرمانہ دینا ہوگا۔ بغیر ہیلمٹ کے دوپہیہ گاڑی چلانے پر ایک ہزار روپے جرمانہ اور تین مہینہ کے لئے لائسنس ضبط کیا جاسکتا ہے۔ اب تک اس کا جرمانہ صرف 100روپے ہوتا تھا۔ اس کے علاوہ دیگر ٹریفک رولز کی خلاف ورزی کرنے سے متعلق قوانین کو بہت سخت بنایا گیا ہے۔

رواں مالی سال کے عام بجٹ میں ایک برس کے دوران ایک کروڑ روپے سے زائد کی رقم نکالنے پر دو فیصد ٹی ڈی ایس کا التزام کیا گیا ہے۔ گھر خریدنے پر بھی زیادہ ٹی ڈی ایس ادا کرنا ہوگا۔ گھر خریدنے پر کلب کی رکنیت اور کار پارکنگ جیسی سہولیات کی مد میں ادائیگی کو پراپرٹی کی قیمت میں جوڑ کر کٹوتی نہیں مانگی جاسکتی۔ گھر کی مرمت کے لئے ٹھیکیدار یا پیشہ ور کو پچاس لاکھ روپے سے زیادہ کی ادائیگی کیے جانے پر پانچ فیصد ٹی ڈی ایس ادا کرنا پڑے گا۔

انڈین ریلوے کیٹرنگ اینڈ ٹورزم کارپوریشن (آر سی ٹی سی) سے ہندوستانی ریلوے کے ٹکٹ بکنگ پورٹل کی ادائیگی کئے جانے پر سروس ٹیکس ادا کرنا پڑے گا۔ اب تک پچاس ہزار سے زیادہ کے لین دین پر اکاؤنٹ ہولڈر کو انکم ٹیکس کو مطلع کرنا ہوتا تھا۔ یکم ستمبر سے اصول بھی بدل رہا ہے۔ ٹیکس ریٹرن کی جانچ کے لئے اکاؤنٹ ہولڈرکے بینک سے کم رقم والے لین دین کے سلسلہ میں بھی معلومات مانگی جاسکتی ہے۔ یکم ستمبر سے بینک کو کسان کریڈٹ کارڈ (کے سی سی) کسان کو پندرہ دن کے اندر جاری کرنا ہوگا۔

ملک کے سب سے بڑے کاروباری بینک اسٹیٹ بینک آف انڈیا کا ہوم لون بھی اتوار سے سستا ہوجائے گا۔ اگر آپ پے ٹی ایم اور فون پے جیسے موبائل ویلٹ کا استعمال کرتے ہیں تو آپ کو اپنے گاہک کو جانو (کے وائی سی) 31اگست تک پوری کرنا ضروری ہے نہیں تو موبائل ویلٹ کی اجازت نہیں ہوگی۔

لائف انشورنس کی میچورٹی کی رقم قابل ٹیکس ہونے پر اصل آمدنی پر پانچ فیصد کے حساب سے ٹی ڈی ایس دینا ہوگا، جن لوگوں نے اب تک آدھار نمبر کو پین کارڈ سے نہیں جوڑا ہے۔ انکم ٹیکس محکمہ انہیں نیا پین نمبر جاری کرے گا۔