شاہین باغ کے فرنیچر مارکیٹ میں لگی زبردست آگ، فائر بریگیڈ کی تین گاڑیاں موجود

دہلی کے شاہین باغ میں زبردست آتشزدگی کا واقعہ پیش آیا ہے جس میں لاکھوں کی مالیت کے نقصان کا اندازہ لگایا جا رہا ہے۔ آگ شاہین باغ ٹھوکر نمبر 7 اور 8 کے درمیان موجود فرنیچر مارکیٹ میں لگی ہے جس کے قریب ایک مسجد بھی موجود ہے، آگ کی لپٹیں اس مسجد تک بھی پہنچنے کی خبر ہے۔ فائر بریگیڈ کی گاڑیاں کافی دیر سے موقع پر پہنچیں جس کی وجہ سے نقصان زیادہ ہو گیا ہے۔

خبروں کے مطابق پہلے آگ فرنیچر مارکیٹ میں ہی لگی تھی جو بعد میں آس پاس تیزی کے ساتھ پھیلنے لگی۔ آگ لگنے کے بعد شاہین باغ کی کچھ مساجد سے اعلان بھی کیا گیا تاکہ لوگ آگ بجھانے کے لیے ضروری اقدامات کریں۔ چونکہ کورونا وائرس کی وجہ سے پورے ملک میں لاک ڈاؤن ہے اس لیے آگ لگنے کی خبر لوگوں کو مسجد سے اعلان کیے جانے کے بعد ہی لگی اور درجنوں لوگ جائے واقعہ پر پہنچ گئے۔ اس دوران مسجد کو نقصان نہ پہنچے اس کے لیے کوششیں کی گئیں اور مسجد سے پائپ نکال کر کچھ لوگوں نے آگ بجھانی شروع کر دی۔

کچھ دیر بعد جب فائر بریگیڈ کی گاڑیاں موقع پر پہنچیں تو آگ کو قابو میں کیا جا سکا۔ اس وقت آگ پر تو قابو پا لیا گیا ہے، لیکن اس وقت تک کافی مالیت کا نقصان پہنچ چکا ہے۔ جائے وقوع پر اس وقت فائر بریگیڈ کی تین گاڑیاں موجود ہیں اور اب یہ یقینی بنایا جا رہا ہے کہ آگ دوبارہ نہ لگ جائے۔ آگ پر قابو پانے کے لیے سب سے پہلے تو فرنیچر مارکیٹ سے کچھ فرنیچرس کو باہر نکالا گیا اور پھر بجلی کے تار کو بھی کاٹا گیا۔ جس کی وجہ سے شاہین باغ ٹھوکر نمبر 8 کی پوری گلی بالکل اندھیرے میں ہے۔

جائے واقعہ پر پولس کی بڑی تعداد موجود ہے جو لوگوں کو جائے واقعہ کے پاس جانے سے روک رہی ہے۔ پولس کورونا وائرس کی وجہ سے بھی لوگوں کو سمجھا رہی ہے کہ سبھی ایک دوسرے سے دوری بنا کر رہیں۔ پھر بھی اس وقت 7 نمبر پر کم و بیش 50 لوگ موجود ہیں۔