حیدرآباد میں آتشزدگی کا دلخراش واقعہ، ایک ہی خاندان کے تین افراد کی جھلس کر موت

حیدرآباد: حیدرآباد میں اتوار کو آگ لگنے سے ایک ہی خاندان کے تین افراد ہلاک ہو گئے۔ یہ واقعہ کشائی گوڈا میں اس وقت پیش آیا جب علی الصبح لکڑی کے ڈپو میں زبردست آگ بھڑک اٹھی اور اس کے شعلے ملحقہ مکان تک پھیل گئے۔ پولیس کے مطابق ٹمبر ڈپو میں گیس سلنڈر پھٹ گیا، جس سے آگ بھڑک اٹھی۔ فائر بریگیڈ کی چار گاڑیوں نے موقع پر پہنچ کر آگ پر قابو پایا۔

جان گنوانے والوں کی شناخت نریش (35)، اس کی بیوی سوما (28) اور بیٹے جوشیت (5) کے طور پر کی گئی ہے۔ جوڑے کا ایک اور بیٹا جو کسی رشتہ دار کے گھر گیا ہوا تھا وہ بچ گیا ہے۔ یہ واقعہ رچاکونڈہ کمشنریٹ کے کشائی گوڈا پولیس اسٹیشن علاقہ کے تحت سائی نگر میں صبح 3 بجے کے قریب پیش آیا۔

شہر میں آتشزدگی کے ایک اور واقعے میں ایک لاری مکینک کی دکان اور ایک گودام جل کر خاکستر ہو گیا۔ حادثہ بہادر پورہ میں پیش آیا۔ آگ پر قابو پانے کے لیے فائر بریگیڈ کی چار گاڑیوں کو تعینات کیا گیا تھا۔ یہاں کسی طرح کا جانی نقصان نہیں ہوا۔