سی بی آئی سربراہ ناگیشور راؤ کی تقرری کے خلاف عرضی پر سپریم کورٹ میں سماعت آئندہ ہفتے

نئی دہلی: سپریم کورٹ انڈین پولس سروس (آئی پی ایس) کے افسر ایم ناگیشور راؤ کو مرکزی تفتیشی بیورو (سی بی آئی) کا عبوری ڈائریکٹر بنائے جانے کو چیلنج کرنے والی درخواست پر اگلے ہفتے سماعت کرے گا۔

چیف جسٹس رنجن گوگوئی کی صدارت والی تین رکنی بینچ نے غیر سرکاری تنظیم کامن كاز کی عرضی پر سماعت کے لئے رضامندی ظاہر کرتے ہوئے کہا کہ وہ اس معاملے میں اگلے ہفتے سماعت کریں گے۔ اس سے پہلے کامن كاز کی جانب سے وکیل پرشانت بھوشن نے چیف جسٹس کی بنچ کے سامنے معاملے کا خصوصی طور پر ذکر کیا اور عرضی کو جمعہ (18 جنوری) تک سماعت کے لئے فہرست میں شامل کرنے کی درخواست کی تھی۔

جسٹس گوگوئی نے اگرچہ پرشانت بھوشن سے کہا کہ وہ درخواست کی سماعت کے لئے تیار ہیں، لیکن جمعہ تک اسے فہرست میں شامل کر پانا مشکل ہو جائے گا۔ انہوں نے کہا کہ اس درخواست پر اگلے ہفتے ہی سماعت ممکن ہے۔ واضح رہے کہ وزیر اعظم نریندر مودی کی صدارت والی اعلی سلیکشن کمیٹی نے آئی پی ایس افسر آلوک ورما کو سی بی آئی کے ڈائریکٹر کے عہدے سے ہٹانے کا فیصلہ کیا تھا۔ اس کے بعد تقرری معاملوں کی کابینہ کمیٹی نے ناگیشور راؤ کو اگلے حکم تک جانچ ایجنسی کا عبوری ڈائریکٹر مقرر کرنے کا فیصلہ کیا گیا جسے عدالت میں چیلنج کیا گیا ہے۔