ہاتھرس عصمت دری: متاثرہ کے اہل خانہ کو ضلع مجسٹریٹ نے دی دھمکی، کانگریس نے کہا 'شرم کرو یوگی سرکار'

اتر پردیش کے ہاتھرس میں اجتماعی عصمت دری کا معاملہ طول پکڑتا جا رہا ہے اور میڈیا میں کئی ایسی خبریں سامنے آ رہی ہیں جو یوگی حکومت پر سوالیہ نشان کھڑے کر رہی ہے۔ تازہ ترین خبروں کے مطابق اجتماعی عصمت دری متاثرہ کے اہل خانہ سے سرکاری افسران دھمکی آمیز انداز میں باتیں کر رہے ہیں۔ میڈیا ذرائع سے موصول ہو رہی خبروں کے مطابق ہاتھرس کے ضلع مجسٹریٹ پروین کمار نے متاثرہ کی فیملی سے اس بات کو لے کر ناراضگی ظاہر کی کہ وہ میڈیا میں کئی طرح کی باتیں پھیلا رہے ہیں۔ انھوں نے کہا کہ "آپ (متاثرہ کی فیملی) اپنی معتبریت ختم مت کیجیے۔ میڈیا والے چلے جائیں گے، ہم ہی آپ کے ساتھ کھڑے ہیں۔ آپ بار بار بیان بدل کر ٹھیک نہیں کر رہے۔"

اے بی پی نیوز کے صحافی پنکج جھا نے اس تعلق سے ایک ٹوئٹ کیا ہے جس میں انھوں نے ضلع مجسٹریٹ پروین کمار کے ذریعہ متاثرہ لڑکی کے والد کے ساتھ دھمکی آمیز انداز میں بات کیے جانے کا تذکرہ کیا ہے۔ ٹوئٹ میں انھوں نے لکھا ہے کہ "پروین کمار نے لڑکی کے والد سے کہا: میڈیا آج یہاں ہے، کل نہیں رہے گی۔ سب چلے جائیں گے۔ آپ حکومت کی بات مان لو۔ آپ بار بار بیان بدل کر ٹھیک نہیں کر رہے ہیں۔ آپ کی خواہش ہے۔ کیا پتہ کل ہم ہی بدل جائیں۔"

پنکج جھا کے اس ٹوئٹ کو ری ٹوئٹ کرتے ہوئے کانگریس کے قومی ترجمان رندیپ سنگھ سرجے والا نے یوگی حکومت کو پرزور طریقے سے تنقید کا نشانہ بنایا ہے۔ سرجے والا نے ٹوئٹ میں لکھا ہے کہ "شرم کرو آدتیہ ناتھ سرکار! ڈوب مرو آدتیہ ناتھ سرکار! عصمت دری کی متاثرہ مہلوک بیٹی کی فیملی کو وزیر اعلیٰ آدتیہ ناتھ کے اشارے پر دھمکیاں۔" ساتھ ہی سرجے والا نے ضلع مجسٹریٹ پروین کمار پر ایف آئی آر درج کر کے کارروائی کا مطالبہ کیا ہے۔