’نفرت لاعلاج کینسر ہے، علاج کی سنجیدگی سے فکر کرنی چاہئے‘

نئی دہلی: آل انڈیا قومی تنظیم کے قومی صدر، سابق مرکزی وزیر اور کانگریس پارٹی کے سینئر لیڈر طارق انور نے اتوار کے روز ایک پروگرام کو خطاب کرتے ہوئے کہا کہ ملک میں دلت، مسلمان، آدیواسی اور پسماندہ افراد دہشت زدہ ہیں۔ انہوں نے کہا کہ آج لنچنگ کا ایسا خوف لوگوں کے ذہن و دماغ پر سوار ہے کہ ہر ماں دہشت زدہ رہتی ہے کہ کہیں اس کا بیٹا واپس لوٹ کر صحیح سلامت گھر آئے گا یا نہیں۔ انہوں نے کہاکہ ہمار ے ملک میں آئین اور قانون ہے لیکن کچھ لوگ خود کو آئین اور قانون سے اوپر سمجھتے ہیں اور قانون کو ہاتھ میں لے کر آئین اور قانون کا گلا گھونٹنے کا کام کرتے ہیں۔ طارق انور نے کہاکہ موجودہ سرکار جس راستے پر ملک کو لے کرجاناچاہتی ہے اسے کسی بھی طرح سے سراہا نہیں جاسکتا۔

انہوں نے کہاکہ اگر ملک میں جمہوریت نہیں رہی تو پھر ملک کا سیکولر ڈھانچہ تباہ ہوجائے گا۔ اس لئے ملک کے سیکولر ڈھانچہ کو بچانے کے لئے ضروری ہے کہ سبھی سماج کے لوگ گاندھی جی کے بتائے ہوئے اصولوں کی پاسداری کریں اور ملک کی جمہوریت کو مزید مضبوط کریں۔ انہوں نے کہاکہ سپریم کورٹ کے کہنے کے باوجود ہماری پارلیمنٹ نے لنچنگ کے خلاف قانون نہیں بنایاجو تشویشناک ہے، لیکن میں مبارکباد دیتا ہوں راجستھان کے وزیراعلیٰ اشوک گہلوت کو جنہوں نے اس سمت میں قانون بنا کر سپریم کورٹ کے اصولوں کی پاسداری کی،ہم شکر گذار ہیں مدھیہ پردیش اور مغربی بنگال سرکار کے کہ انہوں نے یقین دہانی کرائی ہے کہ وہ اس سمت میں قانون بنانے جارہے ہیں۔

مسٹرانور نے کہاکہ نفرت ایسا کنسر ہے جو لاعلاج ہے۔ یہ سماج کو کھوکھلاکررہا ہے۔اس کو جتنی تیزی سے ہمارے سماج میں پیوست کرنے کی کوشش ہورہی ہے اس کا مقابلہ گاندھی جی کے اصولوں کو سامنے رکھ کر کرنے کی ضرورت ہے جنہوں نے اس حکومت کے خلاف آزادی کا کیلئے عدم تشدد کا راستہ اختیار کیا جس کا سورج کبھی غروب نہیں ہوتا تھا۔

انہوں نے کہاکہ اقوام متحدہ نے گاندھی جی کی اہمیت کو سمجھا لیکن دکھ اس بات کی ہے کہ ہمارے ملک میں بسنے والے کچھ لوگ ان کی اہمیت کو نہیں سمجھ پارہے ہیں۔انہوں نے کہاکہ آج جس بے حیائی سے قانون کا غلط استعمال ہورہا ہے وہ انتہائی شرمناک ہے۔ اس لئے سبھی سماج کے لوگوں کو متحدہ کر نفرت کے خلاف آوازبلند کرکے گاندھی، نہرو امبیڈکر، پٹیل اور آزاد کے ہندوستان کو بچانے کی ضرورت ہے۔ ہمیں یہ سمجھنا ہوگا کہ ہندو مسلم اتحاد اگر ہمارا چلا گیا تو ہماری کثرت میں وحدت کی تاریخ ختم ہوجائے گی، کیونکہ مولانا آزاد نے کہاتھاکہ میں آزاد ی میں تاخیر تو برداشت کرسکتا ہوں لیکن یہ برداشت نہیں کرسکتاکہ ہندو مسلم اتحاد کی قربانی پر آزادی ملے۔

اس موقع پر دہلی پردیش قومی تنظیم کے صدر عبدالسمیع سلمانی نے کہاکہ قومی تنظیم سبھی سماج کے لوگوں کو ساتھ لے کر چلنے کیلئے پابند عہد ہے۔ انہوں نے کہاکہ ہم چاہتے ہیں کہ ہندوستان سے نفرت کا خاتمہ ہو اسی لئے ہم نے نعرہ دیا ہے نفرت چھوڑو بھارت جوڑو اور یہ تبھی ممکن ہے جب سبھی سماج کے لوگ قومی تنظیم سے جڑیں اس لئے ہم سب سے اپیل کرتے ہیں کہ وہ قومی تنظیم سے جڑیں۔

اس موقع پر سابق رکن پارلیمنٹ مہابل مشرا نے طارق انور کو اپنا سیاسی گرو بتاتے ہوئے کہاکہ طارق انور نے کبھی ہندو مسلم کے نام پر بھید بھاؤ نہیں کیا اس لئے ہم ان کے ساتھ ہیں۔ہم بھی کبھی مذہب کے نام پر بھید بھاؤ نہیں کریں گے۔ اس پروگرام کا انعقاد سید قمر الدین کی جانب سے کیا گیا اور اس موقع پر انہیں مغربی دہلی ضلع قومی تنظیم دہلی پردیش کا انچارج بھی بنایاگیا۔