کھانے میں ایک روٹی کم دیتی تھی مالکن، ملازم نے اتارا موت کے گھاٹ!

ہریانہ کے یمنانگر کی نیو جین نگر کالونی میں ایک ملازم نے مبینہ طور پر ایک روٹی کے لئے اپنی مالکن کا چاکو سے گلا کاٹ کر قتل کر دیا۔ پولس نے جمعہ کو اس واردات سے پردہ اٹھایا۔ پولس کے مطابق ملزم ملازم نے بتایا کہ اسے چار روٹی کی بھوک رہتی تھی لیکن اس کی مالکن اسے تین روٹی ہی دیتی تھی، جس کی وجہ سے وہ بھوکا رہا جاتا تھا۔ لہذا اس نے اپنی مالکن کا گلا کاٹ کر قتل کر دیا۔

واردات کو انجام دینے کے بعد ملازم نے خود ہی مالک کو فون کیا اور رشتہ داروں کو لے کر گھر پہنچا۔ موت کی اطلاع پاکر لوگ گھر آئے تو ملازم انہیں پانی بھی پیش کرتا رہا۔ پولس کے مطابق جب سختی سے اس سے پوچھ گچھ کی گئی تو اس نے اپنے جرم کا اعتراف کر لیا۔

قتل کے ملزم ملازم کا نام راجیش پاسوان یہے۔ اس نے اپنی 26 سالہ مالکن روزی کا قتل کیا ہے۔ روزی کے شوہر دیپانشو اسٹون کرشر چلاتے ہیں۔ سنیچر کو ملزم کو عدالت میں پیش کر کے پولس ریمانڈ پر بھیج دیا گیا ہے۔

پوچھ گچھ کرنے پر ملزم راجیش نے بتایا کہ ’’مالک دیپانشو کی شادی سے قبل ہی وہ کھانا بناتا تھا اور جو چاہے وہ کھاتا تھا لیکن گزشتہ سال شادی کے بعد سے مالکن روزی نے اس سے کھانا پکوانا بند کر دیا۔ وہ صاف صفائی اور کپڑے دھونے کا کام کرنے لگا۔ راجیش نے کہا، ’’مجھے چار پانچ روٹی کی بھوک رہتی تھی لیکن مالکن تین روٹی سے زیادہ نہیں دیتی تھی۔ میں نے کئی مرتبہ کہا کہ اتنے سے میری بھوک نہیں جاتی۔ مارچ میں میرے والد کا انتقال ہو گیا۔ میں اپنے گھر بہار گیا۔ وہاں سے آیا تو اپنے حصہ کی ایک روٹی کتے کو بھی دینے لگا۔‘‘

ملزم راجیش کے مطابق جمعرات کو اسے بہت زیادہ بھوک لگی تھی لیکن اس کی مالکن نے شوہر دیپانشو کے آنے تک کھانا نہیں بنانے کی بات کہی۔ راجیش نے بتایا کہ ’’اس بات پر مجھے اتنا غصہ آیا کہ میں کچن سے چاقو اٹھا کر لایا اور بستر پر ہی مالکن کا گلا کاٹ دیا۔ مالکن نے بچنے کی کوشش کی۔ میرے ہاتھ کو دانتوں سے کاٹا لیکن میں نے چھڑا لیا اور 5 منٹ کت گردن پر چاقو چلاتا رہا۔‘‘

راجیش نے بتایا کہ اس نے قتل کے بعد چاقو کو کچن میں دھو کر رکھ دیا۔ اس کے بعد اپنے کمرے میں جانے لگا لیکن جب گیٹ نہیں کھلا تو چھوٹے گیت سے کود کر باہر آ گیا۔ وہاں جا کر خون سے آلودہ کپڑوں کو دھویا۔ اس کے بعد دوپہر تقریباً 1.45 بجے مالک دیپانشو کو فون کر کے جھوٹی کہانی بنائی کہ مالکن گیٹ نہیں کھول رہیں۔ راجیش کے مطابق، ’’میں ڈر گیا تھا اور مجھے معلوم تھا کہ اگر میں بھاگا تو پکڑا جاؤں گا۔ گھر میں ہی رہوں گا تو شاید کسی کو شک نہیں ہوگا یہی سوچ کر میں نہیں بھاگا۔‘‘