کسان تحریک اور کورونا کے بڑھتے معاملوں سے پریشان وزیر اعلیٰ کھٹر نے کی نڈّا سے ملاقات

چنڈی گڑھ: ہریانہ کے وزیراعلیٰ منوہرلال کھٹر نے آج نئی دہلی میں بھارتیہ جنتاپارٹی (بی جے پی) کے قومی صدر جگت پرکاش نڈا سے ملاقات کی اوراس دوران کسان تحریک سمیت ریاست سے متعلق مختلف اہم موضوع پر بات چیت ہوئی۔ نڈا سے ملاقات کے بعد نئی دہلی واقع ہریانہ بھون میں میڈیا سے بات چیت میں منوہر لال کھٹر نے کہا کہ ملاقات کے دوران کسان تحریک کی صورت حال کے علاوہ کورونا کی موجودہ حالت کے پیش نظر ہریانہ میں کئے گئے انتظامات کے تناظر میں بھی تبادلہ خیال ہوا۔

تبدیلی مذہب کے تعلق سے قانون لائے جانے کے تناظر میں ایک سوال پر وزیر اعلیٰ نے کہا کہ اس بارے میں یاتو آرڈیننس یاپھر اسمبلی اجلاس میں قانون بنایا جائے گا۔ ایک دیگرسوال پر وزیراعلیٰ نے کہا کہ بیٹیوں کی حفاظت کے لئے 12 سال کی عمر تک بچیوں کے ساتھ ہونے والے جرائم کے معاملات کی سماعت کوفاسٹ ٹریک کورٹ کے تحت لایا گیا تھا۔ خواتین کے خلاف کرائم کے تمام معاملات سے سختی سے نمٹاجائے گا۔

ریاست میں کابینہ کی توسیع کے تعلق سے سوال پر منوہر لال کھٹر نے کہا کہ اس سلسلے میں بی جے پی کے قومی صدر سے ان کی کوئی بات چیت نہیں ہوئی۔ ہریانہ میں فلم سٹی کی تعمیر سے متعلق انہوں نے کہا کہ اس کے لئے پنجور میں ایچ ایم ٹی کی زمین سے کچھ زمین فلم سٹی کے لئے نشان زد کی گئی ہے۔ یہ فلم سٹی ایک طرح سے بیس کیمپ طرح کی ہوگی۔ اس کی ترقی کی اسکیم تیارکی جارہی ہے۔ فلم سٹی آئندہ 6-4 ماہ میں قائم کردی جائے گی۔