ہریانہ اسمبلی انتخاب: کانگریس نے سبھی 90 حلقوں کے پینل تیار کیے، اسکریننگ کمیٹی کی میٹنگ آج ممکن

ہریانہ میں یکم اکتوبر کو ہونے والے اسمبلی انتخاب کو لے کر کانگریس پوری طرح سرگرم ہے۔ اس سلسلے میں پارٹی نے سبھی 90 حلقوں کے لیے آئی درخواستوں کی کاٹ چھاٹ کا کام مکمل کرکے پینل تیار کرلیا ہے۔ اس کے تحت 25 سے 30 سیٹیں ایسی ہیں جن کے پینل میں صرف ایک نام رکھا گیا ہے جبکہ اتنی ہی سیٹیں ایسی ہیں جہاں 2 سے 3 دعویداروں کے نام شامل کیے گئے ہیں۔ کچھ کو چھوڑ کر زیادہ تر موجودہ اراکین اسمبلی کو ٹکٹ ملنے کی امید کی جا رہی ہے۔

گزشتہ دنوں دہلی میں ہوئی ہریانہ انتخابی کمیٹی کی میٹنگ میں درخواستوں کی کاٹ چھاٹ کے بعد پینل بنانے کا فیصلہ کیا گیا تھا۔ ریاستی انچارج دیپک بابریا اور ریاستی صر چودھری اُدئے بھان کو درخواستوں کی کاٹ چھاٹ کرکے پینل بنانے کی ذمہ داری سونپی گئی تھی۔ اب اس پینل کو اسکریننگ کمیٹی کے پاس بھیجا جائے گا۔ اس وقت ریاست میں کانگریس کے 28 اراکین اسمبلی ہیں۔ 5-6 اراکین اسمبلی کے حلقوں میں عوام میں تھوڑی ناراضگی ہے جس کا کانگریس پہلے سروے کرائے گی اس کے بعد آخری فیصلہ کر سکتی ہے۔ کچھ حلقوں میں اراکین اسمبلی کی جگہ ان کے کسی رشتہ دار کو بھی ٹکٹ ملنے کا امکان ہے۔

غور طلب رہے کہ سوموار کو اسکریننگ کمیٹی کی میٹنگ بھی ہونی تھی لیکن کسی وجہ سے میٹنگ نہیں ہوسکی۔ حالانکہ اسکریننگ کمیٹی کے صدر اجئے ماکن نے سوموار کو ریاست کے پانچوں شکست خوردہ لوک سبھا امیدواروں کو ایک ایک کرکے بلاکر ان سے فیڈ بیک لیا۔ اپنے اپنے حلقوں میں امیدواروں کو لے چرچا بھی کی گئی۔ امید ہے کہ پانچوں لوک سبھا امیدواروں کو اسمبلی انتخاب میں اتارا جائے گا۔ اس سلسلے میں منگل کو میٹنگ ہونے کا امکان ہے۔

جن حلقوں کے پینل میں صرف ایک نام ہیں وہ ہیں گڑھی- سانپلا-کیلوئی، روہتک، جھجربادلی، بہادرگڑھ، نوہ، فیروزپور-جھرکا، پُنہانا، این آئی ٹی، رادور، نارائن گڑھ، ڈب والی، کالانوالی، لاڈوا، برودا، اسند، کلانور، اُچانا کلاں، ہوڈل، گنّور، تھانیسر، انبالہ کینٹ، کیتھل، پلول، رائی، مہم، گروگرام، سوہنا بڑکھل، فرید آباد، بلبھ گڑھ، پرتھلا، ہتھین، باڑھ را، لوہارو۔