پی ایم مودی کی مخالفت میں نوجوان نے اسٹیج پر پھینکا کاغذ، پوچھا ’کہاں ہے بیٹی بچاؤ، بیٹی پڑھاؤ؟‘

وزیر اعظم نریندر مودی کو ہریانہ کے تھانیسر میں ایک شخص کی زبردست مخالفت کا سامنا کرنا پڑا۔ دراصل پی ایم مودی تھانیسر میں ایک انتخابی ریلی سے خطاب کر رہے تھے۔ اسی درمیان ایک شخص نے ’بیٹی بچاؤ، بیٹی پڑھاؤ‘ پر سوال اٹھاتے ہوئے نعرہ بازی شروع کر دی پی ایم مودی کے اسٹیج کی طرف کچھ کاغذ پھینکے۔ حالانکہ پی ایم نے اس دوران اپنا خطاب جاری رکھا۔ پی ایم مودی کی مخالفت کر رہے شخص نے چیختے ہوئے کہا ’’کہاں ہے بیٹی بچاؤ، بیٹی پڑھاؤ؟‘‘

پی ایم مودی کی ریلی میں ایک شخص کے ذریعہ ہوئے اس احتجاج کی وجہ سے وہاں ہنگامہ پیدا ہو گیا اور تقریباً پانچ منٹ بعد ہی پولس نے اسے اپنی گرفت میں لے لیا۔ احتجاج کر رہے شخص کو سادی وردی میں موجود پولس اہلکاروں نے احتجاج کرنے سے روکا اور پھر اسے ریلی کی جگہ سے باہر لے گئے۔ اس درمیان وہاں افرا تفری کا ماحول دیکھنے کو ملا۔ ریلی میں موجود لوگ جب تک سمجھ پاتے پولس اہلکار اسے وہاں سے لے گئے۔ لوگ اپنی جگہ پر کھڑے ہو گئے اور یہ جاننے کی کوشش کرنے لگے کہ آخر ہو کیا رہا ہے۔

احتجاج کرنے والے شخص کی پہچان جگادھری کے رہنے والے اشوک کمار کی شکل میں ہوئی ہے۔ اس نے مودی کے خطاب کی جگہ پر جو کاغذ پھینکا اس میں پی ایم مودی کو مخاطب کرتے ہوئے لکھا گیا تھا کہ یمنا نگر میں آٹھویں درجہ میں پڑھنے والی ایک طالبہ کے ساتھ 26 اگست کو اس کے ٹیچر نے مبینہ طور پر جنسی استحصال کیا۔ اس شخص نے خط میں الزام عائد کیا ہے کہ جب اس معاملے کی شکایت پولس سے کی گئی تو انھوں نے کوئی کارروائی کرنے کی جگہ طالبہ کے والدین پر ہی ایف آئی آر درج کر دی۔ کمار نے الزام عائد کیا کہ دھرنے کے بعد بھی پولس نے ایف آئی آر واپس نہیں لی۔ اس معاملے پر پولس سپرنٹنڈنٹ آستھا مودی سے جب پوچھا گیا تو انھوں نے کہا کہ معاملے میں جانچ چل رہی ہے۔

دوسری طرف اس واقعہ پر کانگریس کے ترجمان رندیپ سنگھ سرجے والا کا رد عمل سامنے آیا ہے۔ انھوں نے ٹوئٹ کر کے پی ایم نریندر مودی کو تنقید کا نشانہ بنایا ہے۔ انھوں نے لکھا ہے کہ ’’ہریانہ کے لوگ سچائی سمجھ چکے ہیں، اب جملوں میں نہیں پھنسنے والے! عوام کا یہ غصہ بتا رہا ہے کہ انھوں نے دھوکے کی حکومت کو ہٹانے کا ذہن بنا لیا ہے۔ اس بار ووٹ کی چوٹ زبردست ہوگی۔‘‘