جو نبھا نہ سکا پتنی سے دوسروں کی سی ڈی بنوائے گا: ہاردک کا مودی پر حملہ

بی جے پی کے حامیوں کی طرف سےسی ڈی جاری کی ہے جس کے حوالے سے کہا جا رہا ہے کہ اس میں دکھائی دینے والا شخص ہاردک پٹیل ہے، اسی ضمن میں ہارک پٹیل نے پلٹ وار کرتے ہوئے شاعری کے ذریعہ نشانہ لگایا ہے۔

پاٹیدار رہنما ہاردک پٹیل نے آج اپنےمخالفین پر بڑا حملہ بولا ہے۔ انہوں نے بالی وڈ فلم کے گانے ’رام چندر کہہ گئے سیا سے‘ کے بول میں کچھ تبدیلی کرتے ہوئے ٹوئٹ کیا ہے’’شری رام کہہ گئے سیا سے ایسا کل یگ آئے گا، گوڈسے کا مندر بنے گا، تمبو رام براجا جائے گا۔ مار نہ سکا جو ایک انگریزوہ گاندھی مار کر ہندو کہلائے گا۔ ‘‘

اس کے بعد کی لائن میں ہاردک نے سی ڈی معاملہ پر بھی مخالفین پرنشانہ لگایا۔ انہوں نے لکھا ’’جو نبھا نہ سکا پتنی سے وہ دوسروں کی سی ڈی بنوائے گا۔‘‘ ہندو مسلم کو باٹنے کے مدے پر انہوں نے لکھا ’’باٹے گا ہندو کو مسلم سے، دلت کو بھی کھا جائے گا۔ گائے کو کہہ کر اپنی ماں، اس کا مانس کھا جائے گا۔‘‘

واضح رہے کہ گجرات میں اسمبلی انتخابات کے لئے 9 اور 14 دسمبر کو پولنگ ہونا ہے جس کے نتائج کا 18 دسمبر کو اعلان کر دیا جائے گا۔ ان انتخابات کے لئے ہاردک کانگریس کو اپنی پوری حمایت دے رہے ہیں۔ اس ہفتہ کے شروعات میں کئی سی ڈی وائرل ہوئی تھیں جسے لے کر دعویٰ کیا جا رہا ہے کہ ویڈیو میں دکھائی دینے والا شخص ہاردک پٹیل ہے۔ اس سی ڈی کو لے کر ہاردک پٹیل نے دعویٰ کیا ہے کہ بی جے پی کی طرف سے اس سی ڈی کو پھیلایا جا رہا ہے جو اس کے حقوق رازداری کی خلاف ورزی ہے۔ انگریزی اخبار انڈین ایکسپریس کو دئے گئے انٹرویو کے دوران ہاردک پٹیل نے کہا تھا کہ ’’اس کرتوت سے بی جے پی کی مایوسی صاف ظاہر ہو رہی ہے۔‘‘ پٹیل نے مزید کہا کہ ’’وہ نہ تو مجھے توڑ سکتے ہیں اور نہ ہی دھمکا سکتے ہیں، اس لئے انہوں نے میرے کردار کو خراب کرنے کے لئے اس ویڈیو کو بنوایا ہے۔ ‘‘