کورونا کے لئے گروگرام میں شروع ہوئی ٹیلی میڈیسن سہولت

ہریانہ کے ضلع گروگرام میں کورونا کے تعلق سے ٹیلی میڈیسن شروع کی گئی ہے تاکہ عوام گھر بیٹھے اس وبا کے بارے میں ڈاکٹر سے مشورہ کرسکیں۔

عوام فون کے ذریعے صبح 9 بجے سے رات 9 بجے تک ہیلپ لائن نمبر 18005728283 پر تجربہ کار ڈاکٹروں سے مشورہ کرسکیں گے، اگر ڈاکٹر کو یہ لگتا ہے کہ رابطہ کرنے والے شخص میں کورونا وائرس ہوسکتا ہے تو وہ اسے جانچ کرانے کی صلاح دے گا اور جیسے ہی جانچ کی سفارش کی جائے گی،اس کی خبر خود بخود سول سرجن کے پاس پہنچ جائے گی۔یہ سہولت گروگرام میٹروپولیٹن ڈویلپمنٹ اتھارٹی (جی ایم ڈی اے)کے تعاون سے شروع کی گئی ہے۔اس میں سبھی سرکاری اور پرائیویٹ ڈاکٹروں کو اپنا رجسٹریشن کرانے کی ہدایت کی گئی ہے۔

ڈسٹرکٹ ڈپٹی کمشنرامت کھتری نے آج یہ معلومات فراہم کرتے ہوئے کہا کہ ابھی تک ضلع کے 3120ڈاکٹروں نے پورٹل پر ہٹ کیا ہے جن میں 1937 ڈاکٹروں نے اپنا رجسٹریشن کیا ہے۔رجسٹریشن کرنے والوں میں 1697 ڈاکٹر نجی شعبہ میں کام کررہے ہیں اور 210 ڈاکٹر سرکاری شعبہ میں۔

واضح رہےان ڈاکٹروں میں بھی 487 ڈاکٹروں نے ٹیلی میڈیسن کرنے اور ٹیلی فون کے ذریعہ سے کووڈ-19 کے بارے میں صلاح مشورہ پر راضی ہوگئے ہیں۔اس پورٹل پر ایلو پیتھک میڈیسن،ہومیو پیتھک،آیورویدک یا ڈینٹل سبھی طرح کے ڈاکٹروں نے اپنا رجسٹریشن کیا ہے۔