احمد آباد: جگنیش کے حامیوں نے بی جے پی ایم پی کو امبیڈکر کی گلپوشی کرنے سے روکا

بابا صاحب ڈاکٹر بھیم راؤ امبیڈکر کی جینتی کے موقع پر گجرات کے احمد آباد میں ان کے مجسمہ کی گلپوشی کے لئے پہنچے بی جے پی رکن پارلیمنٹ اور دیگر رہنماؤں کو احتجاج کا سامنا کرنا پڑا۔ بی جے پی رکن پارلیمنٹ کریٹ سولنکی پارٹی کے دیگر رہنماؤں کے ساتھ امبیڈکر کے مجسمہ کی گلپوشی کے لئے پہنچے تھے۔ دریں اثنا کچھ لوگوں نے ان کے خلاف احتجاج کرنا شروع کر دیا۔ اطلاعات کے مطابق احتجاج کرنے والے افراد کو جگنیش کے حامی قرار دیا جا رہا ہے۔ بعد ازاں پولس نے مظاہرہ کرنے والوں کو حراست میں لے لیا۔

گزشتہ روز 13 اپریل کو دلت رہنما اور ممبر اسمبلی جگنیش میوانی نے اعلان کیا تھا کہ امبیڈکر جینتی کے دن کسی بھی بی جے پی رہنما کو امبیڈکر کے مجسمہ کی گلپوشی نہیں کرنے دیں گے۔ اسی لئے یہ تصور کیا جا رہا ہے کہ بی جے پی رکن پارلیمنٹ کی مخالفت کرنے والے جگنیش میوانی کے ہی حامی تھے۔

واقعہ پر میڈیا سے گفتگو کرتے ہوئے بی جے پی کے رکن پارلیمنٹ کریٹ سولنکی نے کہا کہ بابا صاحب (امبیڈکر) ہمارے دیوتا ہیں۔ ان کی گلپوشی کرنے سے روکنے والا جگنیش کون ہوتا ہے؟

جگنیش میوانی نے اپنے حامیوں کو پولس کی طرف سے حراست میں لئے جانے کی تصدیق کرتے ہوئے ٹوئٹ کیا ہے۔

قبل ازیں میوانی نے 14 اپریل کو کَچھ کے دلتوں کو انصاف دلانے کے لئے ہائی وے جام کرنے کا اعلان کیا تھا۔ میوانی نے کہا تھا کہ کَچھ کی راپر تحصیل کے دلت اور کولی سماج کے لوگوں کو حکومت سے گزشتہ 30 سالوں میں ان کی زمین کے حقوق نہیں ملے ہیں۔ تاہم، میوانی کے اعلان کے بعد 13 اپریل کو کَچھ کے کلکٹر نے آناً فاناً ایک ہی دن میں 100 ایکڑ سے زیادہ زمین کا قبضہ دلتوں کو دے دیا۔ بعد ازاں میوانی نے اپنی تحریک واپس لے لی۔

واضح رہے کہ ایس سی-ایس ٹی ایکٹ پر سپریم کورٹ کے فیصلے کی مخالفت میں جگنیش میوانی نے 13 اپریل کو اعلان کیا تھا کہ امبیڈکر جینتی کے موقع پر کسی بھی بی جے پی رہنما کو امبیڈکر کے مجسمہ کو ہاتھ نہیں لگانے دیا جائے گا۔ میوانی نے وزیر اعظم مودی پر نشانہ لگاتے ہوئے کہا تھا کہ مودی کی سیاست کو دیکھیں تو ایسا محسوس ہوتا ہے کہ ان کی زبان پر امبیڈکر کا نام ہے لیکن ان کے دل میں ’منو‘ پوشیدہ ہے۔

میوانی نے کہا کہ اب تک مارے گئے 11 دلتوں کو لے کر وزیر اعظم مودی نے ایک بھی لفظ نہیں بولا۔ اس سے پہلے اونا کے واقعہ کے متاثرین پر بھی انہوں نے کچھ نہیں بولا تھا۔ گجرات کے نوجوان رکن اسمبلی جگنیش میوانی نے کہا کہ بی جے پی کے لوگ آئین کو تبدیل کرنا چاہتے ہیں۔