گجرات اسمبلی انتخاب: پہلے مرحلہ میں ہوئی ووٹنگ کا حتمی نتیجہ اب آیا سامنے، 63.31 فیصد پولنگ درج

گجرات اسمبلی انتخاب کے پہلے مرحلہ میں ہوئی ووٹنگ کا حتمی نتیجہ اب سامنے آ چکا ہے۔ رپورٹ کے مطابق پہلے مرحلہ میں سوراشٹر، کچھ اور جنوبی گجرات کی 89 اسمبلی سیٹوں پر یکم دسمبر کو ہوئی ووٹنگ میں مجموعی طور پر 63.31 فیصد ووٹرس نے حق رائے دہی کا استعمال کیا۔ ریاست کے 23976670 ووٹروں میں سے 15178862 نے ووٹ ڈالا، جس میں 8166905 مرد (65.69 فیصد) اور 7011795 (60.75 فیصد) خواتین شامل ہیں۔

پہلے مرحلہ میں کپراڈا سیٹ کے لیے سب سے زیادہ 79.57 فیصد پولنگ ہوئی، اس کے بعد دھرم پور میں 78.32 فیصد اور بنسدا میں 78.23 فیصد پولنگ ہوئی۔ تینوں قبائلی ریزرو سیٹیں ہیں۔ سب سے کم ووٹنگ گاندھی دھام سیٹ کے لیے ہوئی جہاں 47.86 فیصد، گڈھاڈا میں 51.04 فیصد اور کرنج میں 50.54 فیصد درج کی گئی۔

وسطی اور شمالی گجرات میں دوسرے مرحلہ کی ووٹنگ کے لیے ہفتہ کی شام کو انتخابی تشہیر تھم جائے گی۔ ووٹروں کو متاثر کرنے کے لیے امیدوار اور ان کے حامی آخر وقت میں خوب جدوجہد کر رہے ہیں۔ سوشل میڈیا پر ایک ویڈیو چل رہی ہے جس میں ایک بی جے پی کارکن کو ایک گودام میں خواتین ووٹروں کو ٹفن بانٹتے ہوئے اور ان سے امیدوار پروین بھائی کے لیے ووٹ مانگتے ہوئے دیکھا جا سکتا ہے۔

وسطی گجرات کے شاہیرا انتخابی حلقہ سے ایک اور ویڈیو سامنے آیا ہے، جس میں موجودہ رکن اسمبلی اور بی جے پی امیدوار ووٹروں کو دھمکی دیتے نظر آ رہے ہیں کہ اگر انھوں نے انھیں ووٹ نہیں دیا تو انھیں 8 دسمبر کو پتہ چل جائے گا اور پھر وہ دیکھیں گے کہ ایسے ووٹروں سے کیسے نمٹا جاتا ہے۔