بی جے پی مسلمانوں کی لاشوں پر حکومت بنانا چاہتی ہے: اعظم خان

سماج وادی پارٹی کے قدآوررہنما اور سابق وزیر محمد اعظم خاں نے کہا ہے کہ راجستھان میں لو جہاد کا کیس گجرات انتخابات کے مد نظر منظر عام پر لایا گیا ہے۔اس کی جتنی بھی مذمت کی جائے اتنی ہی کم ہے۔ بھارتیہ جنتا پارٹی (بی جے پی) مسلمانوں کی لاشوں پر حکومتیں بنانے کی کوشش کر رہی ہے۔ بی جے پی نے الیکشن کمیشن اور میڈیا کو اپنی مٹھی میں کر لیا ہے، ان کے ذریعہ ہر طرح کی پبلیسٹی اور من مانے فیصلہ کرا رہی ہے۔ معزز عدالت کو بھی اپنے دباؤ میں لینے کی کوشش ہو رہی ہے۔

اعظم خاں کے میڈیا انچارج فصاحت علی خان عرف شانو نے اعظم خان کی جانب سے جاری بیان میں کہا کہ راجستھان میں لو جہاد کا معاملہ منظر عام پر لانا اور پھر اس سوشل میڈیا پر اس واقعہ کو شیئر کرکے ناقص سیاست کی جارہی ہے، اس کا مقصد صرف اور صرف گجرات انتخابات میں فتح حاصل کر نا ہے۔ اس واقعہ کی ہر ذی شعور شخص مذمت کرے گا۔

یاد رہے کہ راجستھان میں گزشتہ 4 مہینوں سے موب لنچنگ کے واقعات بڑھتے ہی جا رہے ہیں اور تما م وارداتوں میں مسلمانوں کے خلاف نفرت کی بنیاد پر حملہ کیے گئے ہیں۔ اپریل میں پہلو خان کو قتل کیا گیا، جون میں پرتاپ گڑھ قصبہ کے ظفر خان کو قتل کیا گیا اور نومبر میں عمر خان کو قتل کر دیا گیا۔