دوسرے دور کے لئے ووٹنگ جاری، کیا بی جے پی اپنا گڑھ بچا پائے گی

روایتی طور پر یہ بی جے پی کا گڑھ تصور کیا جاتا ہے لیکن اس مرتبہ سب سے بڑا سوال یہ ہے کہ کیا بی جے پی اس گڑھ کو بچانے میں کامیاب رہے گی؟

دوسرے دور کے ان انتخابات میں شمال اور سینٹرل گجرات کے 14اضلاع کی 93سیٹوں کے لئے ووٹنگ ہو رہی ہے، ان میں وزیر اعظم نریندر مودی کے اسمبلی حلقہ کے علاوہ نائب وزیر اعلی نتن پٹیل کی مہسانہ اور الپیش ٹھاکر کی واو سیٹیں بھی شامل ہیں۔

ادھر کانگریس صدر راہل گاندھی نے ٹوئٹ کر کے لوگوں سے بڑی تعداد میں ووٹ کرنے کی اپیل کی ہے۔ انہوں نے ٹوئٹ کیا ’’گجرات میں نئے دور کی شروعات ہو چکی ہے۔ آپ کا ایک ووٹ جمہوریت کی بنیادکو مضبوط کرے گا۔ گجرات کی عوام سے اپیل ہے کہ گجرات کے روشن مستقبل کے لئے زیادہ سے زیادہ ووٹ کریں‘۔

راہل گاندھی نے یہی اپیل گجراتی زبان میں بھی کی ہے۔

واضح رہے سال 2012میں بی جے پی کو ان 93سیٹوں میں سے 52سیٹیں اور کانگریس کو 39سیٹیں ملی تھیں۔ اس دور میں 93سیٹوں میں سے 33سیٹیں او بی سی اور 15سیٹیں پاٹیدار اکثریت والی سیٹیں ہیں اور ان دونوں برادریوں نے ہی کانگریس کو حمایت دینے کا اعلان کیا ہے۔ واضح رہے پہلے دور میں قریب 68فیصدی ووٹ پڑے تھے۔

ادھر وزیر اعظم نے بھی عوام سے اپیل کی ہے اور ساتھ ہی تمام مقامی اخبارات میں بی جے پی نے اشتہار شائع کرائے ہیں۔