گجرات: موربی میں پل ٹوٹنے کے بعد جان بچانے کے لئے ندی میں تیرتے نظر آئے لوگ، ویڈیو وائرل

احمد آباد: گجرات کے موربی میں کیبل برج حادثے میں مرنے والوں کی تعداد بڑھ رہی ہے۔ پیر کی صبح 7 بجے تک مرنے والوں کی تعداد 143 تک پہنچ گئی تھی۔ مچھو ندی میں ریسکیو آپریشن کو تیز کرنے کے لیے فوج کی مدد لی جا رہی ہے۔ ایس ڈی آر ایف کے ساتھ این ڈی آر ایف کی ٹیمیں بھی اس کام میں لگی ہوئی ہیں۔

حادثہ کی ایک ویڈیو وائرل ہو رہی ہے، جس میں پل ٹوٹنے کے بعد ندی میں گرے ہوئے لوگ جان بچانے کے لئے تیرتے ہوئے نظر آ رہے ہیں۔ جبکہ کچھ لوگ ٹوٹے ہوئے پل کے بقیہ حصہ کو پکڑ کر کسی طرح جان بچانے کی کوشش کر رہے ہیں۔ ویڈیو میں دیکھا جا سکتا ہے کہ کچھ لوگ جو دریا میں گرنے سے بچ گئے تھے وہ خود کو بچانے کے لیے پل کے بقیہ حصے کو پکڑ کر اوپر چڑھنے کی کوشش کر رہے ہیں۔

این ڈی ٹی وی کی رپورٹ کے مطابق جس وقت پل منہدم ہوا اس پر تقریباً 500 افراد موجود تھے۔ اس پل کو چار دن پہلے ہی مرمت کے بعد کھولا گیا تھا۔ اطلاعات کے مطابق پل کی تزئین و آرائش کا سرکاری ٹینڈر اودھو جی پٹیل کی ملکیت والے اوریوا گروپ کو دیا گیا تھا۔

وزیر اعظم نریندر مودی نے گجرات کے وزیر اعلی بھوپیندر پٹیل اور متعلقہ حکام سے موربی میں ہونے والے حادثے کے بارے میں بات کی ہے۔ انہوں نے ریسکیو آپریشن کے لیے فوری ٹیمیں تعینات کرنے کا مطالبہ کیا ہے۔ انہوں نے صورتحال پر گہری نظر رکھنے اور متاثرہ لوگوں کو ہر ممکن مدد فراہم کرنے کو کہا ہے۔