گڈو جمالی اویسی کی مجلس کو چھوڑ کر بی ایس پی میں شامل، اعظم گڑھ سے ہوں گے لوک سبھا امیدوار

لکھنؤ: آل انڈیا مجلس اتحاد المسلمین (اے آئی ایم آئی ایم) کو یوپی میں اس وقت بڑا جھٹکا لگا جب اسمبلی انتخابات میں پارٹی کی عزت بچانے والے واحد امیدوار شاہ عالم عرف گڈو جمالی نے اسد الدین اویسی کا ساتھ چھوڑ دیا۔ گڈو جمالی پھر سے بہوجن سماج پارٹی (بی ایس پی) میں شامل ہو گئے ہیں۔

میڈیا رپورٹ کے مطابق گڈو جمالی اب اعظم گڑھ سے لوک سبھا کے ضمنی انتخاب میں بی ایس پی کے امیدوار ہوں گے۔ یہ سیٹ سماجوادی پارٹی کے سربراہ اکھلیش یادو کے استعفی پیش کئے جانے کے بعد خالی ہوئی ہے۔ گڈو جکمالی اس سے قبل بی ایس پی کے لیڈر تھے، جو ایم آئی ایم میں شامل ہو گئے تھے۔

خیال رہے کہ اتر پردیش کے اسمبلی انتخابات میں اویسی کی جماعت نے 403 میں سے 100 سے زیادہ سیٹوں پر اپنے امیدوار کھڑے کئے تھے۔ تاہم گڈو جمالی وہ واحد امیدوار تھے جن کی ضمانت ضبط نہیں ہوئی تھی۔ گڈو جمالی انتخابات میں چوتھے نمبر پر رہے اور انہوں نے 36419 ووٹ حاصل کئے۔

اس سیٹ پر سماجوادی پارٹی کے امیدوار اکھلیش نے جیت حاصل کی ہے۔ جبکہ بی ایس پی امیدوار دوسرے اور بی جے پی امیدوار تیسرے مقام پر رہا۔ یاد رہے کہ اعظم گڑھ کی 10 اسمبلی سیٹوں پر سماجوادی پارٹی نے قبضہ کیا ہے۔