کورونا: نوئیڈا میں ضلع اسپتال کی بڑی لاپروائی، کوڑادان سے ملا استعمال شدہ پی پی ای کِٹ

اتر پردیش کے گوتم بدھ نگر (نوئیڈا) میں کورونا انفیکشن مریضوں کی تعداد 366 ہو گئی ہے اور لگاتار طبی محکمہ و ضلع انتظامیہ مل کر کورونا سے نمٹنے کے لیے کئی طرح کے سخت اقدام کر رہے ہیں۔ لیکن اسی درمیان ضلع اسپتال میں استعمال میں لائے گئے پی پی ای کٹ کے ڈسپوزل کو لے کر زبردست لاپروائی سامنے آئی ہے، جو یہاں علاج کرانے آ رہے دوسرے لوگوں کے لیے مصیبت بن سکتی ہے۔

دراصل نوئیڈا ضلع اسپتال میں کورونا سے بچاؤ کے لیے ڈاکٹروں اور طبی اہلکاروں کو پی پی ای کٹ کی سہولت دی گئی ہے تاکہ ڈاکٹر انفیکشن سے بچے رہیں۔ لیکن اسپتال میں پی پی ای کٹ کو استعمال کرنے کے بعد انھیں عام کچرے کے ڈبے میں ہی پھینکنے کی بات سامنے آ رہی ہے۔ اس واقعہ کے سامنے آنے کے بعد ضلع اسپتال کی سی ایم ایس ڈاکٹر وندنا شرما نے کہا کہ "جس نے بھی یہ پی پی ای کٹ پھینکی ہے، میں اس کی جانچ کروں گی۔ لیکن ہم نے پی پی ای کٹ کو پھینکنے کی سب کو ٹریننگ دی ہوئی ہے۔ ہو سکتا ہے ایمرجنسی میں کسی نے پھینک دی ہو۔"

اس لاپروائی کے معاملے میں گوتم بدھ نگر کے ضلع مجسٹریٹ سہاس ایل وائی کا کہنا ہے کہ "اگر ایسا کچھ ہے تو ہم ضرور پتہ کریں گے اور کارروائی کریں گے۔" غور طلب ہے کہ کووڈ-19 سے نمٹنے کے لیے جاری گائیڈ لائنس کے تحت سبھی بایومیڈیکل فضلات کو ضابطوں کے مطابق ہی پھینکا جاتا ہے۔ اس کے لیے اسپتال میں لال، کالے، پیلے اور سفید رنگ کے کوڑے دان رکھے گئے ہیں۔ پی پی ای کٹ کو استعمال کے بعد ہائپوکلورائٹ کے گھول میں ڈبویا جاتا ہے اور بعد میں اسے تھیلے میں پیک کیا جانا ہوتا ہے۔ کوارنٹائن سنٹرس سے جو کچرا نکلتا ہے، اسے پیلے بیگ میں اکٹھا کر کے بایو میڈیکل ویسٹ ٹریٹمنٹ میں بھیجنا ہوتا ہے۔