اتحاد نے ’مجبور‘ مسلمانوں کا نام تک نہ لیا! اکثیرتی طبقہ نے پھر بھی ہرا دیا: ڈاکٹر ایوب

پرتاپ گڑھ۔: سماج وادی پارٹی، بی ایس پی و لوک دل کے عظیم اتحاد کی شکست میں یادو۔جاٹو و جاٹ رائے دہندگان نے اہم کردار ادا کیا۔ یادو۔جاٹو و جاٹ اکثریت کے بوتھوں پر بی جے پی کو کامیابی حاصل ہوئی ہے۔ جبکہ مسلم اکثریت کی پارلیمانی سیٹوں پر عظیم اتحاد کو کامیابی ملی ہے۔

پورے انتخاب کے دوران عظیم اتحاد و نے مسلمانوں کا نام تک لینے تک سے پرہیز کیا تاکہ اکثریت کے ووٹ حاصل ہو سکیں لیکن اکثریت نے ان کو مسترد کر دیا اور مودی کا دامن پکڑ لیا۔ عظیم اتحاد کو اس کے غرور نے غرق کر دیا۔ اتر پردیش میں پرتاپ گڑھ ضلع کے شہر پنچایت کٹرہ میدنی گنج میں واقع پیس پارٹی کے قومی نائب صدر ڈاکٹر عبدالرشید انصاری کی رہائش گاہ پر بدھ کی شام پارٹی کے قومی صدر ڈاکٹر ایوب سرجن صحافیوں سے بات چیت کے دوران مذکورہ تاثرات کا اظہار کیا۔

پیس پارٹی کے قومی صدر ڈاکٹر ایوب سرجن نے کہا کہ پیس پارٹی کی کوشش کے باوجود اتحاد سے الگ کر دیا گیا جس کے سبب مسلمانوں میں حق رائے دہی میں عدم دلچسپی رہی۔ پارلیمانی انتخاب میں یادو۔جاٹو و جاٹ کے پچاس فیصدی رائے دہندگان بی جے پی کی حمایت کر رہے تھے۔ جبکہ صرف مسلم رائے دہندگان ہی بی جے پی کی شکست کے لئے کوشاں تھا۔

جن سیٹوں پر مسلم اکثریت میں تھے وہاں عظیم اتحاد کامیاب ہوا ہے اور جہاں یادو۔جاٹو و جاٹ کی اکثریت تھی وہاں عظیم اتحاد کو مزید شکست ہوئی ہے۔عظیم اتحاد اپنے غرور میں مست تھا اس کو اعتماد تھا کی یادو۔جاٹو و جاٹ وغیرہ دیگر پسماندہ اس کے ساتھ ہیں اور مسلمانوں کی مجبوری ان کے ساتھ رہنے کی ہے جس کے سبب وہ صوبہ میں نمایا ں کردار ادا کریں گے۔ اس کے برعکس پسمادہ طبقات نے عظیم اتحاد کو مسترد کر بی جے پی کی کامیابی میں اہم کردار ادا کیا۔

حقیقت تو یہ ہے کی اتحاد کے جن امیدواروں کی ضمانت محفوظ ہے اس میں مسلمانوں کا اہم کردار ہے۔ انہوں نے کہا کہ پیس پارٹی اسمبلی کی کھالی سیٹوں پر ہونے والے ضمنی انتخاب میں حصہ لے گی اور سبھی سیٹوں پر امیدوار کھڑا کرے گی۔ صوبہ میں نظم نسق کے حالات ابتر ہیں اور بدعنوانی عروج پر ہے۔ افسر و ملازمین بے لگام ہو گئے ہیں۔ ترقیاتی کام کہیں زمین پر نظر نہیں آرہا ہے۔