’کالجیم کی سفارش پر حکومت کے ذریعہ جواب دینے کی مدت طے ہو‘، سابق جج روہنٹن ایف نریمن کا مطالبہ

کالجیم سسٹم کو لے کر مرکزی حکومت اور عدالت عظمیٰ کے درمیان رسہ کشی میں اضافہ کے درمیان سابق جج روہنٹن ایف نریمن کا ایک اہم بیان سامنے آیا ہے۔ انھوں نے کہا ہے کہ کالجیم سسٹم کی سفارشات پر حکومت کے ذریعہ جواب دینے کی مدت طے ہونی چاہیے۔ دراصل کالجیم کی تجویز پر حکومت کے جواب دینے کی فی الحال کوئی مدت طے نہیں ہوتی۔ اس وجہ سے حکومت کئی ججوں کے مجوزہ ناموں پر کوئی جواب نہیں دیتی اور ججوں کی سپریم کورٹ میں تقرری اٹکی رہتی ہے۔

سابق جج آر ایف نریمن کا کہنا ہے کہ ‘‘جب ایک بار پانچ یا اس سے زیادہ ججوں کی بنچ آئین کی تشریح کر دیتی ہے تو آئین کی دفعہ 144 کے تحت ایک ’اتھارٹی‘ ہونے کے ناطے یہ آپ کی ذمہ داری ہے کہ آئینی بنچ کے فیصلے کا احترام کریں۔ آپ اور میں بطور ملک کے شہری اس کی تنقید کر سکتے ہیں لیکن ایک اتھارٹی ہونے کے ناطے آپ اس فیصلے کو ماننے کے لیے مجبور ہیں، پھر چاہے وہ فیصلہ صحیح ہو یا غلط۔‘‘ روہنگٹن ایف نریمن نے یہ بیان ساتویں چیف جسٹس ایم سی چاگلا میموریل لیکچر میں اپنی تقریر کے دوران دیا۔

جسٹس نریمن نے اپنے خطاب کے دوران کہا کہ سپریم کورٹ کو ایک آئینی بنچ تشکیل دینی چاہیے جو حکومت کو کالجیم کی سفارش پر جواب دینے کی مدت کار طے کرے۔ قابل ذکر ہے کہ میمورینڈم آف پروسیجر، جو کہ آئینی عدالتوں میں تقرری کے لیے 1999 میں بنایا گیا تھا، اس میں کالجیم کی سفارش پر کسی اعتراض کی حالت میں حکومت کے جواب دینے کی مدت کار طے نہیں کی گئی ہے۔

جسٹس نریمن کا کہنا ہے کہ میری عاجزانہ صلاح ہے کہ اگر ایک بار کالجیم کے ذریعہ حکومت کو نام بھیج دیے جائیں اور ایک طے مدت کار تک حکومت اس پر کوئی جواب نہیں دیتی ہے تو یہ مان لیا جانا چاہیے کہ حکومت کے پاس کہنے کے لیے کچھ نہیں ہے۔ جسٹس نریمن نے متنبہ کیا کہ آج جس طرح سے حکومت ناموں کو روک کر رکھتی ہے، وہ ملک میں جمہوریت کے لیے بے حد خطرناک ہے۔ اگر آپ کے بے خوف اور آزاد جج نہیں ہوں گے تو پھر کچھ نہیں بچے گا۔