اورنگ آباد ٹرین حادثہ کی مجسٹریٹی جانچ کے احکام

مہاراشٹر میں جومہاجر مزدوروں کے ٹرین سے کچلے جانے کا دل دہلانے والا واقعہ پیش آیا تھا اس میں اب قانونی پیش رفت ہوئی ہے۔ یہ پیش رفت رسمی ہے یا کسی کو ذمہ دار ٹھہرا کر سزا بھی دی جائے گی اس کا پتہ تو جانچ کے بعد ہی معلوم ہو گا۔

مہاراشٹر کے اورنگ آباد میں ہوئے ٹرین حادثہ میں مدھیہ پردیش کے شہڈول ڈویزن کے 16مزدوروں کی موت پر شروع کی گئی مجسٹریٹیل جانچ پر اعتراض کے تعلق سے سب ڈویزنل مجسٹریٹ دفتر اورنگ آباد میں درخواست دی جاسکتی ہے۔

سرکاری اطلاع کے مطابق 18مئی کو اورنگ آباد ضلع کے کرمانڈ سے بدناپور ریلوے اسٹیشن کے درمیان ریلوے ٹریک پر سورہے مزدوروں کو ایک مال گاڑی نے کچل دیا تھا جس سے 16مزدوروں کی موت ہوگئی تھی۔ اس سلسلہ میں فوجداری ضابطہ 1973کی دفعہ 176کے مطابق سب ڈویزنل مجسریٹ اورنگ آباد کے ذریعہ مجسٹریٹیل جانچ شروع کی گئی ہے اگر کسی کو اس سلسلہ میں کوئی اعتراض ہے تو اس کی اشاعت سے سات دنوں کے اندر اسے سب ڈویزنل مجسٹریٹ افسر اورنگ آباد میں پیش کیا جاسکتا ہے۔

واضح رہے کورونا وائرس وبا کے پھیلنے کی وجہ سے مرکزی حکومت نے ملک گیر لاک ڈاؤن نافذ کر دیا تھا جس کی وجہ سے جو جہاں تھا وہ وہیں رہ گیا تھا اور تمام کارخانہ تو بند ہوئے ہی تھے ساتھ میں شہروں میں رہ رہے دہاڑی مزدوروں کے کام کاج ختم ہو گئے تھے اور ان کا گزر بسر مشکل ہو گیا تھا۔ اس صورتحال میں بڑی تعداد میں مہاجر مزدوروں نے اپنے گھر کارخ کیا تھا۔ سواری نہ ملنے کی وجہ سے یا تو وہ پیدل جا رہے تھے یا پھر کہیں سے کوئی سواری مل رہی تھی تو وہ لے رہے تھے۔ یہ 16مزدور جو مال گاڑی سے کچل گئے تھے وہ بھی ایسے ہی جا رہے تھے۔