مودی حکومت نے 3 سال میں سرمایہ داروں کا 2.4 لاکھ کروڑ قرض معاف کیا

ریاستی وزیر شیو پرتاپ شکلا نے راجیہ سبھا ممبر پارلیمنٹ ریتابرتا بنرجی کے سوال کے تحریری جواب میں اس بات کا اعتراف کیا ہے کہ مالی سال 15-2014 سے ستمبر 2017 کے درمیان پبلک سیکٹر کا بینکوں نے 241911 کروڑ روپے قرض معاف کر دیا ہے۔ وزارت مالیات نے آر بی آئی کے گلوبل آپریشنز کے اعداد و شمار کے حوالے سے یہ جانکاری دی۔

ممبر پارلیمنٹ ریتابرتا بنرجی نے کرونی کیپٹلسٹ (سرمایہ دار) کے قرض معافی کے متعلق اپنے سوال میں یہ جاننا چاہا تھا کہ کیا یہ سچ ہے کہ ستمبر 2017 تک کرونی کارپوریٹ پر بقایہ پبلک سیکٹر کے بینکوں کا 2.4 لاکھ کروڑ قرض موجودہ مرکزی حکومت نے معاف کر دیا ہے؟ اور اگر ایسا ہے تو ان کارپوریٹ گھرانوں کے نام بتائے جائیں اور قرض معافی کا سبب بتایا جائے۔

وزارت مالیات نے اس سوال کے جواب میں کہا کہ آر بی آئی قانون کے مطابق قرض داروں کی جانکاری خفیہ رکھی جاتی ہے اور اسے نہ تو بتایا جا سکتا ہے اور نہ ہی شائع کیا جا سکتا ہے۔

اس پورے معاملے پر ممبر پارلیمنٹ ریتابرتا بنرجی نے ’قومی آواز‘ سے خاص بات چیت میں بتایاکہ ’’سرکار کارپوریٹ کی قرض معافی کے سوال سے انکار کی حالت میں ہے اور میرے سوال کا ٹھیک سے جواب نہیں دے رہی ہے۔ اس سے صاف پتہ چلتا ہے کہ حکومت صرف کارپوریٹ گھرانوں کو خوش رکھنا چاہتی ہے اور عوام کے مفاد کی اسے کوئی پروا نہیں ہے۔‘‘

بنرجی نے ’قومی آواز‘ کو اس بات کی بھی جانکاری دی کہ وہ اس مسئلے پر وزیر مالیات کو ایک خط لکھیں گے اور پورے معاملے میں وضاحت پیش کرنے کی گزارش کریں گے۔

قابل ذکر ہے کہ کارپوریٹ کی قرض معافی سے جڑے ایک سوال پر مرکزی وزیر مالیات ارون جیٹلی نے بھی اگست 2017 میں لوک سبھا کو یہ بتایا تھا کہ حکومت نے کارپوریٹ گھرانوں کے ذریعہ لیا گیا 1 روپے قرض بھی معاف نہیں کیا ہے۔ انھوں نے اپوزیشن سے کہا تھا کہ وہ پہلے اپنی دلیلوں کی جانچ کر لیں۔ انھوں نے یہ بھی بتایا تھا کہ قرض معاف کرنا بینکوں کا ایک کمرشیل فیصلہ ہوتا ہے۔