یوگی کے وزیر نے اردلی سے صاف کرائی چپل، تصویر وائرل

عوام کو اخلاقیات کا درس دینے والے یوپی حکومت کے وزیر کی ایک تصویر سوشل میڈیا پر خوب وائرل ہو رہی ہے جس سے ظاہر ہوتا ہے کہ ان کے پاس اخلاقیات نام کی کوئی چیز موجود نہیں ہے۔ تصویر کشی نگر کی ہے، جس میں یوگی کے وزیر مملکت راجندر پرتاپ سنگھ عرم موتی سنگھ کی چپل اردلی اپنے ہاتھوں سے صاف کرتا نظر آ رہا ہے۔

وزیر موتی سنگھ ایک تقریب میں شرکت کے لئے پہنچے تھے، بتایا جا رہا ہے کہ تصویر اسی تقریب کی ہے۔ فوٹو میں اردلی اپنے ہاتھوں سے ان کی چپل کو صاف کرتا نظر آ رہا ہے۔ اسی دوران کسی نے موبائل سے ان کی تصویر کھینچ لی اور اسے سوشل میڈیا پر وائرل کر دیا۔ حالانکہ جب وزیر سے اس تعلق سے سوال کیا گیا تو انہوں نے لاتعلقی ظاہر کی۔ انہوں نے ایسے کسی واقعہ کے پیش آنے سے صاف انکار کر دیا۔

اتنا ہی نہیں وزیر کچھ بولتے اس سے پہلے ہی ان کے ساتھ موجود ونے رائے نے ان کی بات کاٹتے ہوئے کہا کہ منتری جی نے تو اپنے ہاتھوں سے لال رومال سے چپل صاف کی ہے۔ حالانکہ تصویر دیکھ کر اندازہ لگایا جا سکتا ہے کہ سچ کیا ہے اور کیا جھوٹ!۔