انٹرویو... ہند-پاک دوستی دونوں ممالک کے مفاد میں: کلدیپ نیر

دیکھیے، گاندھی جی سے میری سیدھی ملاقات کبھی نہیں ہوئی۔ میں نے گاندھی جی کو بڑلا ہاؤس کے لان میں دیکھا تھا۔ میں جب تقسیم کے بعد پاکستان سے آیا تو دریا گنج میں اپنی موسی کے یہاں رکا۔ 13 ستمبر کو میں پاکستان سے چلا تھا اور 15 یا 16 کو میں دہلی پہنچا۔ اور سیدھے بھاگ کر گاندھی کو دیکھنے کے لیے بڑلا ہاؤس پہنچا۔ اس وقت گاندھی جی لان میں ٹہل رہے تھے۔ میں نے ان کو دروازے کے باہر سے ہی پرنام کیا تھا۔ ہاں، جب ان کا قتل ہوا تھا تب میں نے اس واقعہ کو رپورٹر کے طور پر ضرور کور کیا تھا۔

دیکھیے، بات اس وقت کی ہے جب میں وزیر داخلہ پنڈت گووند بلبھ پنت کے ساتھ کام کر رہا تھا۔ نہرو وزیر اعظم تھے۔ نہرو پارلیمانی کمیٹی کی اس رپورٹ سے ناراض تھے جس میں پنت جی نے انگریزی کے آگے ’سبسیڈیری‘ لکھ دیا تھا۔ پنت جی ہی اس پارلیمانی کمیٹی کے سربراہ تھے۔ تب پنت جی نے مجھ سے کہا کہ آپ دہلی کی ہر لائبریری کی خاک چھان ماریے اور جتنی بھی ڈکشنری ملے دیکھیے۔ میں نے کئی ڈکشنری دیکھی اور پھر پنت جی کو بتایا کہ سبسیڈیری اور ایڈیشنل قریب قریب ایک ہی معنی میں استعمال کیے جاتے ہیں۔

ایسا نہیں تھا کہ نہرو کے ذہن میں ہندی کو لے کر حقارت کا جذبہ تھا۔ وہ چاہتے تھے کہ جو غیر ہندی زبان کے لوگ ہیں انھیں بھی ہندی آنی چاہیے۔ لیکن شمال مشرقی، جنوب کے لوگ تو بالکل بھی ہندی نہیں جانتے تھے۔ آزادی کے بعد ہی کہیں زبان کے مسئلے پر مخالفت نہ ہونے لگے، اسی لیے وہ چاہتے تھے کہ ہندی کو تب تک نہ نافذ کیا جائے جب تک غیر ہندی زبان لوگ اسے قبول نہیں کر لیتے۔

نہرو سے میری دو تین مرتبہ کی ملاقاتیں ہیں۔ نہرو کی سوچ جدید تھی۔ انگریزی کے معاملے میں ان کی یہی سوچ کام کرتی تھی۔ ان کا ماننا تھا کہ انگریزی عالمی زبان ہے۔ میں نے سیالکوٹ میں پہلی بار نہرو کو دیکھا تھا۔ میرے خیال سے 1939 کے آس پاس کی بات ہے۔ انتخابی تشہیر پر آئے تھے۔ نہرو کا لباس تو وہی تھا جو وہ عام طور پر پہنتے تھے، لیکن اس دن نہرو نے گلاب نہیں لگا رکھا تھا۔ مجھے یاد ہے۔ ان کے ساتھ شیخ عبداللہ بھی تھے۔

ہاں، میں بھگت سنگھ سے متاثر ہوں۔ وہ 23 سال کی عمر میں انتقال کر گئے۔ ملک کے لیے شہید ہو گئے۔ ان کے نظریات زبردست طریقے سے انقلابی تھے۔ لیکن کتاب لکھنے کا خیال 80 کی دہائی میں لاہور میں آیا۔ میں وہاں گیا ہوا تھا ایک پنجابی سمیلن میں۔ وہاں میں نے دیکھا کہ پورے ہال میں صرف اور صرف ایک تصویر ہے۔ وہ ہے بھگت سنگھ کی۔ میں نے آرگنائزر سے پوچھا کہ یہاں تم لوگوں نے بھگت سنگھ کی تصویر کیوں لگا رکھی ہے۔ یہاں تو اقبال کی تصویر ہونی چاہیے، جنھوں نے پاکستان کا خواب دیکھا تھا۔ ان لوگوں نے کہا کہ صرف ایک ہی پنجابی نے ملک کے لیے قربانی دی ہے اور وہ ہے بھگت سنگھ۔ تبھی میں نے طے کر لیا کہ بھگت سنگھ اور ان کے نظریات کو ملک کے سامنے واضح کرنا ہے۔ ویسے تو ان کے بارے میں تقریباً ہر بات لکھی جا چکی ہے لیکن ایک انقلابی اور ایک دہشت گرد کے درمیان کے فرق کو تاریخی دریافت اور دلیلوں کے ذریعہ واضح کرنا ضروری تھا۔

بھگت سنگھ کی اہمیت پہلے بھی تھی اور آج بھی ہے، بلکہ میں تو ایسا کہتا ہوں کہ جیسے جیسے وقت گزرے گا، بھگت سنگھ کی اہمیت بڑھتی جائے گی۔ وہ نوجوان تھے اور ہیرو تھے۔ نوجوان طبقہ ہمیشہ بھگت سنگھ کے نظریات سے متاثر رہے گا۔ گاندھی کی بھی اہمیت بڑھے گی، لیکن دونوں کے درمیان فرق طریقوں کا ہے اور وہ رہے گا۔ بھگت سنگھ بندوق (تشدد) کا راستہ چھوڑنے کے لیے تیار نہیں تھے اور گاندھی کو یہ منظور نہیں تھا۔ گاندھی کو تشدد قطعی منظور نہیں تھا۔ انھوں نے اِرون سے کہا بھی تھا کہ اس کو چھوڑ دیجیے۔ لیکن نہ تو بھگت سنگھ اپنا راستہ چھوڑنے کے لیے تیار تھے اور نہ ہی انگریز بھگت سنگھ کو چھوڑنا چاہتے تھے۔ گاندھی جی نے بھگت سنگھ کی مقبولیت سے ڈر کر نہیں بلکہ وہ انھیں اپنے اصولوں کی وجہ سے نہیں بچا پائے۔

ہاں یہ درست ہے۔ میں نے اپنی صحافت اردو رپورٹر کے طور پر شروع کی تھی۔ جب میں پاکستان سے ہندوستان آ گیا اور چاندنی چوک میں رہ رہا تھا تو میرے احاطے میں ایک آدمی دن بھر کھانستا رہتا تھا۔ میں بڑا پریشان ہوتا تھا۔ میں نے لوگوں سے پوچھا کہ بھئی یہ کون ہے؟ پتہ چلا کہ وہ مولانا حسرت موہانی صاحب تھے۔ میں ان کے پاس گیا۔ انھوں نے مجھ سے پوچھا کہ کیا کرتے ہو؟ میں نے کہا کہ اردو رپورٹر ہوں۔ تب میں ’وحدت‘ کے لیے لکھا کرتا تھا۔ دھیرے دھیرے ان سے دوستی ہو گئی۔ انھوں نے مجھے دو صلاح دیں تھی۔ پہلا یہ کہ شعر و شاعری کرنا چھوڑ دو۔ دوسرا، اردو میں نہیں انگریزی میں لکھنا شروع کرو۔ ملک میں اردو کا کوئی مستقبل نہیں۔