گوا انتخاب: راہل گاندھی نے جیت کا دعویٰ بھی کیا اور ممکنہ سیٹوں کی تعداد بھی بتائی

کانگریس کے سابق صدر راہل گاندھی نے 11 فروری کو گوا میں پارٹی کی جیت کا دعویٰ کرتے ہوئے عزم ظاہر کیا کہ عوامی فلاح کے لیے کئی سارے اقدام کیے جائیں گے۔ کرچوریم میں انتخابی ریلی سے خطاب کرتے ہوئے انھوں نے کہا کہ ’’اس بار گوا میں اصل لڑائی بی جے پی اور کانگریس کے درمیان ہے۔ باقی پارٹیاں بھی ہیں، لیکن ان میں کوئی بھی حکومت نہیں بنا سکتی۔‘‘ راہل گاندھی نے ساتھ ہی کہا کہ ’’حکومت بنے گی تو کانگریس پارٹی کی ہی بنے گی۔ آپ اپنا ووٹ خراب مت کیجیے۔‘‘ اتنا ہی نہیں، کانگریس لیڈر نے پارٹی کو 30 سے 35 سیٹیں ملنے کی امید ظاہر کی۔

راہل گاندھی نے اپنے خطاب میں عوام سے کہا کہ ’’گوا کی حکومت آپ کو چننی ہے۔ میں چاہتا ہوں کہ کانگریس پارٹی کی حکومت جو بننے والی ہے، وہ کسی لیڈر، کسی ایک شخص کی حکومت نہ ہو۔ لیکن وہ حکومت گوا کی عوام، گوا کے نوجوانوں، گوا کے کسان، مزدور، چھوٹے دکانداروں کی حکومت ہو۔‘‘ انھوں نے آگے کہا کہ ’’جو بھی فیصلے ہم لیں گے وہ آپ سے پوچھ کر، آپ سے بات کر کے لیں گے۔ گوا کے سامنے دو تین بڑے مسائل ہیں جن کو آپ مجھ سے بہتر جانتے ہیں۔ ان میں ایک مسئلہ بے روزگاری کا ہے، یہ پورے ملک کا مسئلہ بھی ہے۔‘‘

راہل گاندھی نے مودی حکومت کے طرز عمل کو بھی اپنے خطاب کے دوران نشانہ بنایا۔ انھوں نے کہا کہ ’’میں نے پارلیمنٹ میں اپنی تقریر میں دو ہندوستان کی بات کی۔ میں نے کہا کہ ایک امیر لوگوں کا ہندوستان ہے، ایک غریب لوگوں کا ہندوستان ہے۔ ملک تقسیم ہوتا جا رہا ہے۔ ایک طرف چند لوگوں کا ہندوستان، ایک کروڑوں لوگوں کا ہندوستان ہے۔ ہمیں ایسا ہندوستان نہیں چاہیے۔ ہمیں ایسا گوا اور ہندوستان نہیں چاہیے۔‘‘ ساتھ ہی وہ کہتے ہیں ’’روزگار غائب ہو گیا ہے۔ دہلی کی حکومت نے ان دکانداروں پر حملہ کیا۔ آپ مجھے بتاؤ کہ نوٹ بندی سے ہندوستان کی غریب عوام کو کیا فائدہ ہوا۔ چھوٹے دکانداروں، کسانوں اور مزدوروں کو چوٹ لگی۔ بینک کے سامنے لائن میں کسی امیر شخص کو آپ نے دیکھا؟ کسی بھی ارب پتی کو دیکھا؟ جی ایس ٹی کے ذریعہ چھوٹے دکانداروں پر حملہ کیا گیا۔‘‘

بی جے پی کو تنقید کا نشانہ بناتے ہوئے راہل گاندھی نے کہا کہ ’’وہ گوا کو کوئلہ ہَب بنانا چاہتے ہیں۔ بی جے پی نے اپنے انتخابی منشور میں ایک بار بھی ماحولیات کا تذکرہ نہیں کیا۔ ہم گوا کو کوئلہ ہَب نہیں بننے دیں گے۔‘‘ اس دوران راہل گاندھی نے عوام سے کہا کہ وہ گوا میں ’نیائے یوجنا‘ نافذ کریں گے، گوا کے سب سے غریب کنبوں کو 6000 روپے ماہانہ دیں گے، 30 فیصد خواتین کو سرکاری ملازمت میں ریزرویشن دیں گے، 500 کروڑ روپے روزگار پیدا کرنے کے لیے مختص کریں گے، اور ٹورزم سیکٹر کو ایک بار پھر سے زندہ کریں گے۔