’ہائی کورٹ جائیے‘، بھوج شالہ میں سروے پر روک لگانے کی ایک اور عرضی پر سپریم کورٹ کا سماعت سے انکار

مدھیہ پردیش کے دھار میں موجود بھوج شالہ کے اے ایس آئی سروے کا کام تیزی کے ساتھ آگے بڑھ رہا ہے اور اس پر روک لگانے کی کوششیں بھی جاری ہیں۔ اے ایس آئی سروے کے خلاف داخل ایک عرضی پر سپریم کورٹ میں گزشتہ پیر کے روز سماعت ہوئی تھی جس میں عدالت عظمیٰ نے سروے پر روک لگانے سے انکار کر دیا تھا۔ آج اس سروے پر روک لگانے کی مزید ایک عرضی پر سماعت سے سپریم کورٹ نے انکار کر دیا۔

عدالت عظمیٰ میں آج قاضی معین الدین کے ذریعہ داخل عرضی پر سماعت ہوئی جس میں مطالبہ کیا گیا تھا کہ بھوج شالہ احاطہ کے اے ایس آئی سروے پر روک لگائی جائے۔ حالانکہ سپریم کورٹ نے اس عرضی کو خارج کر دیا اور صاف لفظوں میں کہہ دیا کہ آپ اس معاملے میں ہائی کورٹ میں فریق نہیں تھے، اس لیے سپریم کورٹ کورٹ آپ کی عرضی پر سماعت نہیں کر سکتا۔ حالانکہ عدالت عظمیٰ نے یہ ضرور کہا کہ عرضی دہندہ اپنی بات ہائی کورٹ میں رکھ سکتا ہے۔

قابل ذکر ہے کہ یکم اپریل کو سپریم کورٹ نے ایک دیگر عرضی پر سماعت کرتے ہوئے بھوج شالہ احاطہ میں اے ایس آئی سروے پر روک لگانے سے انکار کر دیا تھا۔ حالانکہ یہ ضرور کہا تھا کہ اس کی اجازت کے بغیر سروے کی رپورٹ کو بنیاد بنا کر کوئی بھی کارروائی نہ کی جائے۔ ساتھ ہی سپریم کورٹ نے یہ بھی کہا تھا کہ سروے کے دوران احاطہ میں توڑ پھوڑ یا کھدائی کا کام نہ کیا جائے۔ اس عرضی پر سماعت کرتے ہوئے عدالت عظمیٰ نے مرکزی حکومت، مدھیہ پردیش حکومت اور اے ایس آئی کو نوٹس بھی جاری کیا تھا جس کا جواب انھیں 4 ہفتے میں جمع کرنے کی ہدایت دی گئی ہے۔