جہاں گائے کٹے گی، وہیں قصائی بھی کٹے گا، گئورکشکوں کا اعلان

نئی دہلی: دہلی کے رام لیلا میدان میں راجستھان گئو رکشا کمانڈو فورس کے ایس ایس ٹائیگر نے کہا ہے کہ وہ جہاں بھی گائے کا قتل ہوتے دیکھیں گے وہاں فوراً قصائی کو بھی گولی مار دیں گے۔ انہوں نے کھلے عام قانون کی خلاف ورزی کرتے ہوئے کہا کہ ’’ہمیں کسی قانون کے دستور کی پرواہ نہیں ہے، جہاں گائے کٹے گی، وہیں قصائی کٹے گا۔‘‘

رام لیلا میدان پر ’’گئو ماتا پرتشٹھا آندولن ‘‘میں شامل ہونے کے بعد ایس ایس ٹائیگر نے کہا کہ ’’آپ لوگوں کو گایوں کا قتل ہوتا دکھائی نہیں دیتا۔ وزراء اور رہنما گونگے ہو سکتے ہیں، لیکن ہم ، اگر کوئی ہماری ماں کے ساتھ ظلم و ستم کرے گا، کیا ہم برداشت کریں گے؟ ہمیں تو صرف سنتوں کے حکم کا انتظار ہے۔‘‘

ایس ایس ٹائیگرمزید کہا کہ وزیر اعظم مودی نے اگر ’گائے ماتا ‘ کو ’مادر وطن ‘ قرار نہیں دیا اور گائے کے ذبح کو پوری طرح ممنوع قرار نہ دیا تو اب نہ وہ کوئی تحریک چلائیں گے اور نہ ہی دھرنا دیں گے۔ وہ جہاں بھی گائے کو ذبح ہوتے دیکھیں گے سر عام ذبح کرنے والوں کو گولی مار دیں گے۔

ایس ایس ٹائیگرنے ملک کے قانون کو چیلنج کرتے ہوئے کہا کہ’’ ملک کا قانون ہمیں پھانسی چڑھا دے یا جیل میں ڈال دے ہمیں اس کی پرواہ نہیں۔‘‘