کشمیر میں بچھی برف کی تازہ چادر، شبانہ درجہ حرارت میں بہتری سے لوگوں کو راحت

سری نگر: وادی کشمیر میں جمعرات کی صبح بھی برف کی ہلکی چادر بچھ گئی تاہم مطلع ابر آلود رہنے سے شبانہ درجہ حرارت میں نمایاں بہتری واقع ہونے سے لوگوں کو ٹھٹھرتی سردی سے کافی حد تک راحت نصیب ہوئی۔

محکمہ موسمیات کے ایک ترجمان کے مطابق گرمائی دارلحکومت سری نگر میں کم سے کم درجہ حرارت 0.4 ڈگری سینٹی گریڈ ریکارڈ کیا گیا۔ بتادیں کہ سری نگر میں 31 جنوری کی شب رواں سیزن کی سرد ترین رات درج ہوئی تھی جب کم سے کم درجہ حرارت منفی 8.8 ڈگری سینٹی گریڈ ریکارڈ ہوا تھا جس سے سردیوں کا تیس سالہ پرانا ریکارڈ ٹوٹ گیا تھا۔

قبل ازیں سری نگر میں رواں سیزن کے دوران 14 جنوری کو سرد ترین رات درج ہوئی تھی جب کم سے کم درجہ حرارت منفی 8.4 ڈگری ریکارڈ ہوا تھا اور سردیوں کا پچیس سالہ پرانا ریکارڈ ٹوٹ گیا تھا۔ وادی کشمیر میں جمعرات کی صبح بھی جب لوگ نیند سے اٹھے تو برف کی مہین چادر نے میدانوں، صحنوں، چھتوں اور اشجار و آبشاروں کو ڈھک لیا تھا، تاہم شبانہ سردیوں میں مزید بہتری واقع ہونے سے لوگوں کو ٹھٹھرتی سردی سے راحت نصیب ہوئی۔

وادی میں اس تازہ ہلکی برف باری سے سڑکوں پر پھسلن پیدا ہونے سے صبح کے وقت ٹرانسپورٹ کی نقل وحمل متاثر ہوئی۔ رواں سیزن کے دوران ہونے والی برف باری اور ریکارڈ ساز سردیوں نے لوگوں کا جینا دو بھر کرکے رکھ دیا ہے۔ لوگوں کا کہنا ہے کہ رواں موسم سرما نے نہ صرف ماضی بعید کی یادوں کو تازہ کر دیا بلکہ سردیوں کے نئے ریکارڈ بھی قائم کیے۔

وادی کے مشہور زمانہ سیاحتی مقام گلمرگ میں کم سے کم درجہ حرارت منفی 6.4 ڈگری سینٹی گریڈ جبکہ وادی کے دوسرے سیاحتی مقام پہلگام میں کم سے کم درجہ حرارت منفی 3.3 ڈگری سینٹی گریڈ ریکارڈ کیا گیا۔

سرحدی ضلع کپوارہ میں کم سے کم درجہ حرارت منفی 0.6 ڈگری سینٹی گریڈ جبکہ قاضی گنڈ میں منفی 0.8 ڈگری سینٹی گریڈ اور ککر ناگ میں منفی 5.1 ڈگری سینٹی گریڈ ریکارڈ کیا گیا۔ محکمہ موسمیات کی پیش گوئی کے مطابق وادی کشمیر میں 4 فروری کو ہلکے درجے کی برف باری کے بعد موسم میں بہتری واقع ہونے کا امکان ہے۔

قابل ذکر ہے کہ وادی کشمیر میں سردیوں کا بادشاہ چالیس روزہ چلہ کلان جس نے اپنے دور اقتدار میں بھر طاقت کا مظاہرہ کیا، اختتام پذیر ہوا ہے اور بیس روزہ چلہ خورد تخت نشین ہوا ہے جس کا جمعرات کو پانچواں دن تھا۔ چلہ خورد کے دور اقتدار کے دوران اگرچہ درجہ حرارت میں بتدریج بہتری واقع ہوجاتی ہے لیکن اس دوران بھاری برف باری کو خارج از امکان قرار نہیں دیا جا سکتا ہے۔