رافیل اور میراج کے رکھ رکھاؤ کے لیے فرانسیسی کمپنی 'ڈسالٹ' نوئیڈا میں قائم کرے گی یونٹ

ہندوستانی فضائیہ کے لڑاکا طیارے رافیل اور میراج 2000 کے رکھ رکھاؤ کے لیے فرانس کی فائٹر جیٹ بنانے والی کمپنی ڈسالٹ نوئیڈا میں اپنی یونٹ شروع کرنے جا رہی ہے۔ فضائیہ میں 1980 کی دہائی میں تقریباً 20 میراج-2000 اور گزشتہ کچھ سالوں میں 36 رافیل فائٹر طیارے کو شامل کیا گیا ہے۔

اے این آئی کی رپورٹ کے مطابق دفاعی افسران نے کہا ہے کہ فرانسیسی کمپنی نے حال ہی میں وزارت دفاع اور فضائیہ کو ہندوستان میں لڑاکا طیارے کے رکھ رکھاؤ، مرمت میں مدد کے لیے ایک نئی ہندوستانی کمپنی ڈسالٹ ایوی ایشن مینٹیننس ریپیئر اینڈ اوورہال انڈیا (ڈی اے ایم آر او آئی) کے قیام کے بارے میں مطلع کیا ہے۔

رپورٹ کے مطابق یہ کمپنی چھ مہینے کے اندر اپنا کام شروع کرکے رفتہ رفتہ سرگرمیوں میں تیزی لائے گی۔ دفاعی افسر کے مطابق خود انحصار ہندوستان کے تحت ڈسالٹ نئی ایم آر او کمپنی قائم کرنے والی ہے۔ کمپنی نے اس سلسلے میں وزارت دفاع کو اطلاع دی ہے کہ اس کمپنی میں ایک ہندوستانی شہری ہوگا اور ہندوستان میں ڈسالٹ کے پرانے نمائندہ پیسینا وینکٹ راؤ اس کے چیف اکزیکٹیو آفیسر ہوں گے۔ واضح ہو کہ وینکٹ راؤ کئی برسوں سے ہندوستان میں ڈسالٹ ایوی ایشن سے جڑے رہے ہیں۔ ان کی ٹیم میں فرانس اور ہندوستان دونوں ممالک کے ملازم ہوں گے۔

ڈسالٹ انڈین ایئروناٹیکل انڈسٹریل ایکو سسٹم کے تعاون سے ڈی اے ایم آر او آئی میں ایم آر او سرگرمیوں کو بڑھانے کا منصوبہ بنا رہا ہے، جس سے فرانس کے فائٹر طیارے کا دائرہ بڑھے گا۔ جگوآر پینیٹریشن فائٹر جیٹس جو ہندوستان میں اپنے آپرینش کے آخری مرحلے میں ہے، انہیں بھی ایم آر او کی طرف سے مدد کی جاسکتی ہے کیونکہ اس کا بھی فرانس سے کنکشن ہے۔

ڈسالٹ ہندوستانی فضائیہ کے ساتھ اپنے رافیل مرین جیٹس فروخت کرنے کے لیے معاہدے پر بات چیت کر رہا ہے۔ ان میں 26 طیاروں کو ہندوستانی فضائیہ کے لیے خریدنے کا منصوبہ ہے جس کی تعیناتی ایئر کرافٹ کیئر آئی اے این ایس وکرانت پر ہوگی۔ ہندوستانی فضائیہ نے امبالہ اور ہاشی مارا میں رافیل لڑاکا طیاروں کے لیے دو بیس بھی تیار کیے ہیں۔