بہار کو مفت کورونا ویکسین، پھر مہاراشٹر کو کیوں نہیں؟ کانگریس کا سوال

ممبئی: بہار اسمبلی انتخابات کے لیے اپنے منشور میں یہ اعلان کرتے ہوئے کہ اگر ریاست میں بی جے پی اقتدار میں آئی تو کورونا کی ویکسین مفت فراہم کی جائے گی، بی جے پی نے کورونا کی ویکسین پر بھی سیاست شروع کردی ہے۔ تمام ریاستوں کو مفت ویکسین فراہم کرنا حکومت کی ذمہ داری ہے۔ اس لیے سوال یہ پیدا ہوتا ہے کہ بہار میں الیکشن ہے اس لیے بہار کو مفت کورونا ویکسین اور مہاراشٹر میں الیکشن نہیں ہے تو کیا مہاراشٹر کو اس سے محروم رکھا جائے گا؟ کیا مرکزی حکومت غریبوں سے کورونا ویکسین کے لیے پیسے وصول کرنے والی ہے؟ یہ سوال آج یہاں مہاراشٹر پردیش کانگریس کمیٹی کے صدر ووزیر محصول بالاصاحب تھورات نے کی ہے۔

بی جے پی کے مفت کورونا ویکسین پر تنقید کرتے ہوئے تھورات نے کہا کہ کورونا کی وبا سے عوام سخت پریشان ہے۔ ابھی تک کورونا کی ویکسین تیار نہیں ہوئی ہے اس کے باوجود محض ووٹوں کے لیے مفت کورونا ویکسین کی لالچ دینا بی جے پی کی گھٹیا سیاست کی ایک اور مثال ہے۔ ہرہندوستانی کو کورونا کی ویکسین مفت ملنا اس کا حق ہے جو اسے ملنا ہی چاہیے۔ منگل کو قوم سے خطاب کرتے ہوئے وزیراعظم نریندرمودی نے یہ اعلان کیا تھاکہ تمام ہندوستانیوں کو کورونا کی ویکسین دینے کے لیے حکومت کی تیاری جاری ہے۔ پھر صرف بہار کے لوگوں کو مفت کورونا ویکسین دینے کا اعلان اپنے انتخابی منشور میں کرنے کا بی جے پی کا کیا مقصد ہے۔

کورونا ویکسین کے لیے ملک کے باشندوں کے ہی پیسے خرچ ہونے والے ہیں۔ پھر یہ صرف بہار کے لیے ہی کیوں؟ کیوں دوسرے لوگوں کو اس کے لیے پیسے ادا کرنے پڑیں گے۔ سچائی یہ ہے کہ یہ صرف عوام کی آنکھوں میں دھول جھونکنے اور کورونا ویکسین کی سیاست کے ذریعے لوگوں کو گمراہ کرکے ان کے ووٹ لینے کی بی جے پی کی کوشش ہے۔

بالاصاحب تھورات نے مزید کہا کہ ریاست کے سابق وزیراعلیٰ اور حزبِ مخالف لیڈر نیز بہار بی جے پی کے نگراں دیوندرفڈنویس نے کہاتھا کہ بہار سے مودی کو زیادہ محبت ہے۔ سوال یہ پیدا ہوتا ہے کہ پھر مہاراشٹر سے مودی کو محبت نہیں ہے کیا؟ یا اگر ہے تو کم کیوں ہے، تمام ریاستوں کے ساتھ برابر کیوں نہیں؟ کیوں ریاستوں کے درمیان امتیاز برتا جارہا ہے۔ اور پھر اگر مہاراشٹر سے مودی کو کم محبت ہے یا محبت ہی نہیں ہے تو سوال یہ پیدا ہوتا ہے کہ مہاراشٹر کو کورونا کی ویکسین دی جائے گی یا نہیں؟

تھورات نے کہا کہ الیکشن آتے ہی بی جے پی کو بے سرپیر کے اعلانات اور جھوٹے وعدے کرنے کی عادت پڑچکی ہے۔ گزشتہ اسمبلی الیکشن میں بہار کو 1.25 لاکھ کروڑ روپئے کا پیکیج دینے کا اعلان وزیراعظم مودی نے کیا تھا۔ اس پیکیج کا کیا ہوا؟ بہار کی عوام کو اس کا گزشتہ پانچ سالوں میں خوب اچھی طرح تجربہ ہوچکا ہے۔ انہیں معلوم ہوچکا ہے کہ انہیں گمراہ کیا گیا تھا اور انہیں یہ بھی معلوم ہے کہ اس بار بھی گمراہ کیا جارہا ہے۔ کیونکہ بہار کی عوام خوب سمجھدار ہے۔ ممبئی میں میونسپل کارپوریشن الیکشن کے وقت اندومل میں ڈاکٹر باباصاحب امبیڈکر کی یادگار کی بھومی پوجن کی گیا تھا۔ اس کے بعد کیا ہوا یہ ہم آج دیکھ سکتے ہیں۔ حقیقت یہ ہے کہ یہ سب بی جے پی کی جملے بازی اور اس کا ہتھکنڈہ ہے۔