مدھیہ پردیش میں 'بھارت جوڑو یاترا' کا چوتھا دن، کچرا اٹھانے والوں سے ملاقات کر کے ان کے مسائل سنے

کھنڈوا/ اندور: کانگریس کے سینئر لیڈر راہل گاندھی کی بھارت جوڑو یاترا آج صبح مدھیہ پردیش کے کھنڈوا ضلع کے مورٹکا سے چوتھے دن شروع ہوئی اور تقریباً 10 بجے منی ہار پہنچنے کی امید ہے۔ راہل گاندھی آج شام ہی اندور ضلع کے مہو میں ان کی جائے پیدائش ڈاکٹر بھیم راؤ امبیڈکر کو خراج عقیدت پیش کریں گے۔

بھارت جوڑو یاترا صبح 7 بجے کے قریب مورٹکا سے بڑواہ پہنچی۔ یہاں سے آگے بڑھتے ہوئے راہل گاندھی نے ٹھہر کر کچرا اٹھانے والوں سے ملاقات کی، ان کے مسائل کو سنا اور انہیں حل کرنے یقین دہانی بھی کرائی۔

قبل ازیں، راہل گاندھی نے کل دیر شام کھنڈوا ضلع میں واقع ملک کے بارہ جیوترلنگوں میں سے ایک اومکاریشور میں واقع دیوتا کی پوجا کی۔ اس موقع پر پرینکا گاندھی اور پارٹی کے سینئر لیڈر بھی موجود تھے۔ راہل گاندھی، پرینکا گاندھی اور دیگر لیڈروں نے اومکاریشور کے قریب نرمدا ندی کی آرتی بھی کی۔

ریاستی کانگریس کے مطابق راہل گاندھی کی بھارت جوڑو یاترا آج چوتھے دن عمیریہ چوکی سے ریاست میں دوپہر تقریباً 3.30 بجے دوبارہ شروع ہوگی۔ صبح کا قیام منیہر میں ہوگا۔ یاترا مایا پور دھام مندر بلواڑا اور پھر شام 6 بجے مہو پہنچے گی۔ یاترا کا آج رات کا آرام اندور ضلع میں ہی مارکم لین کے قریب دسہرہ گراؤنڈ ہوگا۔

اندور کے بعد، راہل گاندھی کی یاترا اجین اور اگرمالوا اضلاع کے مختلف علاقوں سے ہوتی ہوئی 4 دسمبر کو راجستھان کی سرحد میں داخل ہوگی۔ یہ یاترا 23 نومبر کو مہاراشٹر کی سرحد سے مدھیہ پردیش کے برہان پور ضلع میں داخل ہوئی تھی۔ اس کے بعد یہ کھرگون اور کھنڈوا اضلاع سے ہوتا ہوا اندور ضلع میں داخل ہو رہا ہے۔

ریاستی کانگریس کے مطابق، دریں اثنا، کانگریس جنرل سکریٹری پرینکا گاندھی آج صبح بھارت جوڑو یاترا میں حصہ لینے کے بعد اندور کے راستے دہلی کے لیے روانہ ہوگئی ہیں۔ وہ 23 نومبر کی رات برہان پور پہنچی اور 24 اور 25 نومبر کو بھارت جوڑو یاترا میں حصہ لیا۔