دہلی میں منکی پوکس کے چوتھے مریض کی تصدیق، نائیجیریائی خاتون متاثر

نئی دہلی: ملک میں منکی پوکس کے خطرے کے درمیان بدھ کے روز راجدھانی دہلی میں اس انفیکشن کے چوتھے مریض کی تصدیق کی گئی ہے۔ عہدیداروں کے مطابق دہلی میں ایک 31 سالہ نائجیرین خاتون اس بیماری سے متاثر پائی گئی ہے۔ اس تازہ معاملہ کے ساتھ ملک میں منکی پوکس انفیکشن کے معاملوں کی کل تعداد 9 تک پہنچ گئی ہے۔

ملک میں منکی پوکس وائرس سے متاثر پائی جانے والی یہ پہلی خاتون ہے۔ ذرائع نے بتایا کہ اس خاتون کو بخار اور جسم پر چکتے ہیں اور اسے لوک نائک جے پرکاش اسپتال (ایل این جے پی) میں داخل کرایا گیا ہے۔ خاتون کا نمونہ ٹیسٹ کے لیے بھیجا گیا تھا، جس کا نتیجہ بدھ کے روز 'مثبت' پایا گیا۔

ذرائع نے بتایا کہ اس خاتون کی ٹریول ہسٹری کا ابھی تک پتہ نہیں چل سکا ہے۔ دریں اثنا دہلی میں منکی پوکس کے پہلے مریض کو پیر کے روز ایل این جے پی ہسپتال سے ڈسچارج کر دیا گیا۔ منکی پوکس سے نمٹنے کے لیے دہلی کے چھ اسپتالوں میں 70 آئسولیشن کمرے بنائے گئے ہیں۔ حکام نے بتایا کہ ان میں سے، ایل این جے پی ہسپتال میں 20 کمرے قائم کیے گئے ہیں، جو کہ منکی پوکس کے مریضوں اور مشتبہ مریضوں کے علاج کے لیے نوڈل مرکز ہے، جبکہ دیگر پانچ اسپتالوں میں ہر ایک میں 10 کمرے بنائے گئے ہیں۔

عالمی ادارہ صحت کی چیف سائنٹسٹ سومیا سوامی ناتھن نے منکی پوکس کے پھیلاؤ کو چشم کشاں قرار دیا ہے۔ انہوں نے کہا کہ چیچک کی ٹیکہ کاری مہم کو 1979-80 سے بند کر دیا گیا ہے۔ منکی پوکس کا پھیلنا ہمارے لیے نیند سے بیدار ہونے والا رہا کیونکہ اس مہلک وبا سے نمٹنے کے لئے خود کو ہر وقت تیار رکھنے کی ضرورت ہے۔