چاروں سینئر جج عدالت پہنچے، مسئلہ جلد سلجھنے کا امکان

چیف جسٹس دیپک مشرا کے خلاف جمعہ کو پریس کانفرنس کر کے آواز بلند کرنے والے چاروں جج آج عدالت پہنچے اور معمول کے کام میں مصروف ہو گئے۔ آج چاروں سینئر جج یعنی جسٹس جے چیلامیشور، رنجن گوگوئی، مدن بی لوکُر اور کورین جوسف نے دیپک مشرا یا عدالتی نظام سے متعلق میڈیا سے کوئی بات نہیں کی۔ اس درمیان چیف جسٹس دیپک مشرا بھی عدالت پہنچے اور جب میڈیا والوں نے ان سے کچھ سوالات کیے تو انھوں نے خاموشی اختیار کر لی۔ وہ سوال سن کر مسکراتے ہوئےاپنے کمرے کی جانب بڑھ گئے۔ اس سلسلے میں اٹارنی جنرل اے ویدناتھن سے جب ایک پرائیویٹ چینل نے بات چیت کی تو انھوں نے بتایا کہ عدالتی کارروائی معمول کے مطابق چل رہی ہے اور کسی طرح کا کوئی مسئلہ نہیں ہے۔

دوسری طرف آج صبح ہی اٹارنی جنرل آف انڈیا وینو گوپال نے اس بات کا دعویٰ کیا ہے کہ سپریم کورٹ کے ججوں کا چیف جسٹس آف انڈیا سے شروع ہوا تنازعہ بہت جلد ختم ہونے کا امکان ہے۔ دراصل سوموار کو اٹارنی جنرل نے چیف جسٹس آف انڈیا سے ملاقات کی تھی۔ چاروں سینئر جج کے ذریعہ آج معمول کے مطابق کام پر لوٹنے کے بعد ایسی امیدیں ظاہر کی جا رہی ہیں کہ یہ مسئلہ مزید پیچیدہ نہیں ہونے والا۔

میڈیا ذرائع کے مطابق آج ججوں نے بوقت صبح ساتھ میں چائے نوشی کی اور ایک دوسرے سے معمول کے مطابق ہلکے پھلکے ماحول میں بات چیت کی۔ واضح رہے کہ چاروں سینئر ججوں کی پریس کانفرنس کے بعد ایک ہنگامہ سا برپا ہو چکا ہے لیکن اس سلسلے میں مرکزی حکومت کھل کر اپنی کوئی بھی رائے رکھنے سے بچ رہی ہے۔ اس مسئلہ کا حل نکالنے کے لیے بار کاؤنسل نے ایک سات رکنی وفد بھی تشکیل دیا ہے جس نے اتوار کو چیف جسٹس دیپک مشرا سے ملاقات کی۔ اس ملاقات کے بعد دیپک مشرا نے کہا تھا کہ بہت جلد درپیش مسائل کا حل نکل جائے گا۔