وزیر اعلیٰ یوگی کے خلاف الیکشن لڑنے پر آمادہ سابق آئی پی ایس افسر امیتابھ ٹھاکر نے نئی پارٹی بنانے کا کیا اعلان

اتر پردیش کے سبکدوش آئی پی ایس افسر امیتابھ ٹھاکر نے جلد ہی اپنی خود کی سیاسی پارٹی شروع کرنے کا اعلان کیا ہے۔ پارٹی کے لیے ’ادھیکار سینا‘ نام کی تجویز پیش کرتے ہوئے ٹھاکر نے اپنے حامیوں سے کہا ہے کہ اگر وہ چاہیں تو متبادل نام بطور مشورہ پیش کر سکتے ہیں۔ انھوں نے پارٹی کے مشن اور ڈھانچے سے متعلق بھی اپنے حامیوں سے مشورے مانگے ہیں۔ امیتابھ ٹھاکر نے کہا ہے کہ پارٹی کی تشکیل کا عمل بہت جلد شروع ہو جائے گا۔

اس سال کے شروع میں حکومت کے ذریعہ سروس سے ’لازمی سبکدوش‘ کیے گئے امیتابھ ٹھاکر پہلے ہی آئندہ اسمبلی الیکشن میں گورکھپور سے وزیر اعلیٰ یوگی آدتیہ ناتھ کے خلاف لڑنے کا ارادہ ظاہر کر چکے ہیں۔ اسی وجہ سے 21 اگست کو پولیس نے انھیں اپنی مہم شروع کرنے کے لیے گورکھپور جانے سے روک دیا تھا۔

یہاں قابل غور بات یہ ہے کہ سابق آئی پی ایس افسر امیتابھ ٹھاکر کو پہلے ہی سہیل دیو بھارتیہ سماج پارٹی کے ذریعہ پارٹی میں شامل ہونے کے لیے مدعو کیا جا چکا ہے اور پیس پارٹی نے بھی آئندہ انتخابات میں ان کی امیدواری کی حمایت کی پیش کش کی ہے۔

واضح رہے کہ آئی پی ایس افسر امیتابھ ٹھاکر اتر پردیش کے بے حد مشہور افسر رہے ہیں اور انھوں نے انتظامیہ سے لے کر محکمہ تک میں کئی طرح کی بدعنوانیوں کے خلاف آواز اٹھائی ہے۔ وہ اور ان کی بیوی نوتن ٹھاکر سماجی کارکن کی حیثیت سے طویل مدت سے مختلف سطحوں پر غلط کاموں سے پردہ اٹھانے کے لیے آر ٹی آئی کا استعمال کر رہے ہیں۔